應唔應該分手?

同男朋友一齊咗幾年

1 同佢係性方面一直都唔係好夾,佢比我更加重視同想有性,每次佢想既時候我都係半推半就,佢想入又入唔到又整到我好痛,近排直頭開始唔係好想同佢有親密少少既接觸

雖然我覺得性唔係好重要,但係都無理由成世人無性掛

2 覺得佢好食懶飛。畢業之後有段長時間都唔去揾工,舊年終於開始返工,又份份工都唔滿意,做兩做就唔做,無一份做得長。佢話過完年就去揾工,但係到而家連search都未開始search。我send埋佢可能會啱既工俾佢佢都唔理我

3 懶,咩都唔肯學。明明係自己既野,次次都要人幫佢搞掂曬先得,明明只係Google下就有既野都唔肯去揾

呢兩點令我覺得佢根本唔肯承擔自己應有既責任,都唔肯自己諗辦法解決問題,令我地之間無咩將來可言。唔想同個懶人一生一世,都唔想做佢阿媽咩都要照顧曬佢。咁樣係咪好自私?定係只係期望唔同?

4 成日約我都遲到要我等佢一大輪。時間地點同做咩野都就曬佢都會遲大到

除咗以上既問題之外佢都對我好好,成日揾我,有咩我想做都會陪我。但係拍拖就話愛情飲水飽姐,要結婚都係要考慮現實問題。

自問無能力都無資格要佢為我改變咩野,但係有d問題真係好難接受,叫過佢改善佢都無咩點改善

我到底應該要包容佢既缺點,定係早分早著唔好浪費大家時間?

如果要分手應該點開口先可以好來好去?

希望可以俾到個考慮既方向我:pleading_face:

Hello~ 多謝你同我地分享你喺親密關係方面嘅煩惱:thought_balloon: 喺字裏行間其實都感受到你對男朋友嘅不滿,想了解下你有無同男朋友表達過你依啲諗法?因為見你提到覺得自己無資格要對方改變,其實喺一段關係中互相磨合係好重要嘅,兩個人總有一啲生活習慣、諗法等等有差異,而依啲差異都係需要大家透過溝通去尋找一個雙方都覺得舒適嘅相處方式,如果單方面忍耐,日積月累嘅負面情緒反而會令關係容易破裂。

所以同伴侶表達你嘅想法係無問題嘅,問題在於如何表達,如果過早下定斷/批評對方,又或者以威脅嘅方式向對方提出請求嘅話,當然會令雙方嘅情緒更負面,影響到雙方嘅關係。所以建議嘗試先同對方表達你觀察到對方嘅行為,然後你對於依啲行為有咩感受,再講出你希望對方可以點樣改善:blush:

而如果你地雙方有就住依啲問題溝通過,但係情況都無改善嘅話,咁結束關係可能都係一個選擇。結束關係時雙方有負面情緒係無可避免嘅,尤其係想繼續依段關係嗰一方,最能夠減低對對方帶黎嘅負面情緒,其實就係盡早同清晰向對方表達你嘅想法,避免以冷落對方或者悪言相向依啲方法去令對方知難而退。希望我地嘅建議都幫到你啦 :relaxed:

1個讚

多謝你既建議 :heartpulse: 我會試下的!