食咗事後丸但係都好焦慮

同男朋友2月11號有性行為
係帶安全套之前都有進入我陰道幾下
都知道男仔會有precum
同埋我都係危險期
所以12號就即刻去咗家計會買咗事後丸
係72小時內食果一種
食完除咗有少少m痛都冇乜其他副作用
同埋feel到乳房有少少漲
但呢幾日都好焦慮

之前有試過遲咗嚟M一個禮拜
係焦慮到個人靜唔到坐低就想喊
不斷上網搵意外懷孕嘅資料
今次預計準時嘅月經日期係27號
然後家計會都約咗我7號都未有月經嘅話就驗孕
然後今次都係一樣好焦慮好驚懷孕

因為上網見到討論區都有人食咗事後之後都懷孕
唔知點算 所以想上嚟問吓一啲相關資料
同埋準備dse
唔可以再咁樣焦慮落去 完全專注唔到溫習
:pray:t2::bowing_woman:t2:

Hello
如果你喺性行為72小時/120小時內有服用醫生處方嘅緊急避孕藥,而食完之後冇嚴重肚瀉/嘔吐,咁懷孕風險會好低嘅。緊急避孕藥係通過高劑量嘅人造荷爾蒙去抑制排卵、改變子宮頸分泌物嘅粘稠度、同埋改變子宮內膜環境,從而達致緊急避孕嘅效果。
如果有正確服用事後藥,避孕功效係好高嘅。網上嘅情況我哋好難去判斷真偽,「食咗事後之後都懷孕」嘅原因可能有好多種,例如超過服藥時效先食藥/同一月經週期服用多個一次導致避孕成功率降低/冇搵醫生處方藥物服用咗來源不明嘅藥物等等。
而因為事後藥有高劑量嘅荷爾蒙,所以係有機會導致副作用出現。不過人人體質唔同,副作用嘅情況亦因人而異。而服用完事後藥嘅其中一個副作用,係有機會影響1-2次月經周期嘅情況(包括月經週期長度、流血日數、流血量、經痛程度等等),所以如果你今次月經情況同平時唔同,其實都可以唔需要太緊張! :blush:

如果你真係好擔心,你可以去家計會覆診之前自行驗孕。驗孕係檢測身體有冇hCG呢種物質,hCG係受精卵著床之後身體會分泌嘅一種荷爾蒙,而卵子受精著床需要大概6-9日。所以,性行為7日後(2月18號)驗孕就會有初步結果,而11日後(2月22號)驗孕就會有係相比較準確嘅結果。你可以等到相應嘅日子進行驗孕呀!可能你親眼見到驗孕結果,就會安心啲。 :relaxed:

而想你明白,月經同埋排卵會受好多唔同身體因素影響。例如荷爾蒙分泌、壓力、作息、藥物、飲食等等。所以日曆/APP嘅紀錄未必可以好準確咁去話俾我哋知幾時排卵、幾時係「安全期」、幾時月經出現。因為日曆/APP並唔會考慮你嘅所有身體因素,例如你今次食咗事後藥、同埋情緒壓力好大,其實呢啲都會導致月經同平時唔同。同埋你準備考DSE,都會有一定嘅壓力,有個案分享過佢應試期間因為壓力影響咗身體,可能2-3個月先有一次月經。

而正正因為月經嘅情況會好容易受到影響,所以,只要陰莖/陰莖分泌物(包括精液、同precum)接觸到陰道/陰道口,就會有一定嘅風險。 :confounded:

驗孕之後,嘗試放鬆下心情,月經會出現嘅! :sparkling_heart:

最後提提你,每次性行為都要全程正確咁使用安全套,咁就可以更加安心啦!

但係我真係好焦慮
坐喺度都會亂咁諗諗到想喊
我有正確咁樣服用事後丸
都知道避孕失敗嘅機會好細
但就係忍唔住諗自己咁唔好彩避孕失敗
想問吓避孕失敗嘅機會率係咪真係好細?

另外我想問一下
17號發生性行為
今日15號有啲反胃冇胃口
食完野有啲作嘔嘅情況發生
想問吓會唔會係懷孕先兆定係壓力太大太過焦慮?

Hello~ 首先事後丸嘅避孕成效高達97-99%,而你亦有喺有效時間內服食,所以唔洗太擔心懷孕風險阿:blush: 至於你提到反胃作嘔嘅情況,其實有好多因素影響,例如情緒、壓力、飲食作息等,所以唔一定係懷孕嘅症狀。如果好擔心嘅話,可以喺性行為嘅7日/11日後進行驗孕。

都感受到你對懷孕嘅焦慮,建議可以考慮下暫時停止性行為,待你心理上準備好之後先繼續:blush: 另外亦都可以嘗試充實一下生活,做下自己感興趣嘅事,或者同朋友傾下計,咁樣都可以減少靜落黎而容易亂諗嘅時間:thought_balloon: