想了解呢個情況下的懷孕風險

平時有食開事前避孕藥
月經亦準時
因事前避孕藥連續食21日後須停藥7日
停藥期間會嚟月經
我喺5-11/2期間停藥,12/2恢復食藥
13/2早上有內射的性行為
想了解懷孕風險大嗎?
亦想了解清楚長期食事前避孕藥
係咪等於任何時間都可進行性行為而受到避孕保障?

補充
我由31/7/2021晚上開始長期服用事前避孕藥至今

Hello~ 如果已經服食避孕藥一段時間,而期間無漏服/嚴重嘅痾嘔嘅話,藥效係會正常發揮嘅,而喺停藥期間藥效都依然會持續。避孕藥嘅避孕成效係~91-99.7%,所以你問到有關懷孕風險方面可以參考返依個數字:blush:

1個讚

謝謝,另外想釐清返,如果確保對方同自己都係單一性伴侶,無性病,純粹由避孕方面考慮,係咪長期只食事前避孕藥,無論咩時候(例如危險期,無食藥果7日等等)都足夠避孕,可以進行內射的性行為?

Hello

首先想你知道,避孕藥係通過服用人造荷爾蒙去抑制排卵,亦都會增加子宮頸分泌物嘅粘稠度同埋改變子宮內膜嘅環境,從而達致避孕嘅功效。如果有每日準時服藥(根據你所講,你嘅服藥pattern係21+7,即係連續服藥21日,停藥7日,然後繼續開始食新一排藥),食完冇嘔吐或者嚴重腹瀉、冇漏食嘅情況,而且你已經服藥一段時間,身體已經建立咗穩定嘅避孕功效,避孕嘅成效係好高嘅(正確服用嘅情況下俾人成功率有~99%) :blush:

食緊避孕藥嘅時候,你會發現停藥嗰7日期間會有「月經」出現,而其實呢個係「撤退性出血」,係因為藥物控制而出現嘅出血;同冇食藥嘅情況之下,因為身體荷爾蒙變化同埋排卵而出現嘅月經並唔一樣。所以,唔會存在「排卵期」/「危險期」。亦即係話,無論係食緊21粒藥,定係7日停藥期期間,懷孕風險都係好低微嘅。 :stuck_out_tongue_winking_eye:
不過都想你知道,除咗完全唔發生性行為之外,暫時未有一種避孕方法係有100%嘅成功率。你可以根據自己嘅需要,選擇最適合自己嘅安全措施。

同埋都想解釋返,避孕藥並唔能夠好似安全套咁有減低性病傳播同埋其他感染風險(例如尿道炎、陰道炎、念珠菌感染)嘅功效。欣賞你同伴侶有檢測,了解自己嘅身體情況,檢查自己有冇感染性病。不過好似HPV呢種病毒,即使係單一性伴侶,亦會有機會感染。如果你擔心嘅,你都可以考慮食藥嘅同時,配合埋安全套一齊使用。同埋你同伴侶都可以考慮打HPV疫苗,亦都建議你定期進行抹片測試。

(Intern同學:融融)