你好
我一直有用月經杯嘅習慣，子宮帽同月經杯兩者都有相似之處，想問其實月經杯可唔可以用嚟當子宮帽作避孕用途？
另外想問可唔可以同時使用月經杯同子宮環？ 印象中子宮環有條尼龍繩連出宮口外，將個杯拎出嚟嘅時候會唔會郁到條繩從而令個環移位？
唔該晒
@dameyodamedame
首先回答返你嘅問題 ，月經杯係唔可以當子宮帽用嘅。雖然感覺上兩者都有相似之處，但係其實子宮帽係一個好似圓形或者半圓形嘅物體，用途係透過覆蓋住子宮頸去避免精子進入到，達到避孕嘅功效。而月經杯係一個杯狀嘅物體，有一定嘅長度， 作用係為咗盛載經血。所以喺設計上兩者並唔一樣亦唔可以互相取代。
而且，一般用子宮帽嘅時候都會配合殺精劑，而呢啲殺精劑並唔係可以隨便普通喺藥房就買到，而且子宮帽都係需要去醫生嗰度處方先至買到，亦要由醫生判斷下幫手選擇適合身體尺寸嘅子宮帽，殺精劑都會喺到時候你買嘅時候處方埋畀你。雖然有啲月經杯係標榜進行性行為嘅時候都可以使用，但係由於月經杯本身嘅設計唔係作避孕用途，所以我哋都唔建議你用月經杯代替子宮帽。
至於月經杯可唔可以同子宮環一齊使用。有一啲嘅月經杯牌子介紹當中係話可以嘅，不過最重要嘅都係需要喺醫生植入子宮環嘅過程當中，同返醫生講你想同時間使用月經杯，因為都需要了解返子宮頸嘅長度，如果你本身子宮頸嘅係比較矮的話就可能唔適合。但如果你本身子宮頸係比較高的位置，由於放咗子宮環之後距離陰道口仲有一定嘅空位，醫生認為適合的話，可以幫你剪返短子宮環條繩。不過之後使用月經杯嘅過程當中就要更加小心，避免喺置入同埋拎返月經杯出嚟嘅時候太大力拉扯。而且因為條繩短咗，平時亦會難啲透過條繩去檢查子宮環嘅位置。
另一方面，如果想同時使用子宮環同月經杯，都會建議喺已經有使用過月經杯一定時間嘅人先考慮。一嚟初初使用子宮環時，身體都會有各種不適，亦要適應有條繩喺度。如果係呢個狀態下再去探索適合自己陰道使用嘅月經杯大細、折法或者使用方式，相對上都會更加困難。
但如果你有呢個打算，都可以同醫生商量一下先，如果身體狀況適合，其他嘅事都可以透過慢慢練習去適應。