咁樣應該分手嗎?

我本身係處,同男朋友5個月半推半就就冇左(有用condom,因為我暫時未覺得想同佢一直行落去),所以一直都好後悔好驚。因為男朋友個底好花。我又冇打HPV疫苗,好驚會後悔一世,因為家庭負擔較大。

我叫左佢去驗HPV DNA檢測,結果係全部病毒陰性,但我都唔放心。因為個次係用尿液驗,唔知準唔準,想問下你地點睇,洗唔洗驗多次(但驗多次佢應該未必肯)?我自己就冇驗,因為一來我知hpv有潛服期,同如果假設男朋友冇事,而我之前一直都冇任何性接觸,打hpv疫苗,係唔係都仲有高既保護性?

另外就係:我打算打hpv疫苗,但想等因為疫情回落先去打。但男朋友覺得要等半年好耐,所以覺得打緊針個半年可以keep住做。但我覺得唔太好,因為我覺得會影響個效果。但佢又話好荒謬,所以我同佢講我清清白白要接受一個個底咁花既人我都好痛苦(一齊左先知),仲要佢都知我好後悔。

衣加我仲覺自己因為佢患上左性恐懼,打算以後都唔再接觸男人,唔再拍拖,覺得性係一件好污糟既事。你地覺得我需要進行心理輔導嗎?

當然,佢有對我好既地方,但佢份人好大男人,我覺得佢唔尊重我。有時我終於明白佢咁多段戀情都失敗既原因。但我又唔知可以搵咩人傾訴,每日驚到咩都做唔到。想問下你地可唔可以比d方向/意見我?呢個情況係唔係應該及時止損分手?我接受唔到佢既過去,覺得佢physically好污糟。

我知我可能過度憂慮,煩到你地唔好意思。

@MM_1
首先回應返你,都會想了解返你講嘅嗰個hpv dna測試係喺邊度做嘅? 因為每間診所用嘅測試工具都唔同,如果嗰個診所係提議用尿液測試的話, 都會有一定可信性嘅。 不過如果你擔心,而你個伴侶又肯再做多次測試嘅話,其實係可以嘅。 再造多次的話,今次應該係攞 尿道裏面嘅組織去化驗。 另外雖然hpv嘅潛伏期(病徵幾時會出現)係2星期至8個月,但其實空窗期(幾時可以透過測試檢測得到)最長14日,所以其實好快已經可以測試到。而且hpv係一個統稱,其實有分高危型同低危型,分別都有好多基因分型。假設而家你感染咗其中一種分型,其實再打hpv疫苗都係有保護性嘅,例如可能你打九合一嘅,其實內裏包含嘅9種嘅基因分型,即使你感染咗其中一種分型,但係疫情對於其他嘅幾隻分型,hpv疫苗仍然有保護作用,所以都唔洗太擔心。

另外,見到你都擔心可能中咗HPV會後悔一世,其實感染HPV後都唔一定會出現病徵或者生殖器官有病變,例如未必會衍生有子宮頸癌等等情況,所以都唔需要太過擔心。即使係其他類型嘅性病,好多都係可以透過藥物根治或者係治療下控制感染嘅狀態,所以感染性病並唔代表世界末日架。

希望你明白到,無論發生咩事,無論你選擇係咩都好,都冇話對或者錯,只有最適合你自己情況嘅選擇。

今次嘅情況似乎唔係性病結果準唔準確,而係無論性病結果如何,其實你已經對你男朋友 同你發生性行為嘅呢個舉動好後悔好驚。 就住呢一部分,都希望你同你講返,其實性行為係發生前嘅其中一個準備係共識。 共識的嘅定義係雙方都同意性行為做到邊一部分,而且喺同意親吻之後,其實並不代表係整個性行為裏面每一個步驟都同意。 半推半就並非一個達到得到雙方共識嘅一個結果。 喺性行為過程當中, 只要其中一方冇明確地用言語表示同意繼續發生,其實性行為係應該終止。 你喺你呢個情況,感覺上男朋友並冇就你嘅情況而停止去進行一啲你唔喜歡嘅行為,導致到你有非常後悔同好驚嘅感覺。 有呢種感覺係非常正常, 頭先希望你唔好因為自己有呢種感覺而感到自責先 。無論有冇用安全措施都好, 其實對你嚟講呢件事發生得都好突然,亦都打亂咗你一路以嚟嘅安排,再加上你所講冇打到疫苗,而且家庭負擔比較大,同時間男朋友以往嘅經歷,所以你有呢啲感覺係完全正常,唔需要感到唔好意思。 用另一個角度嚟講,一個行為有性意味而其中一方係不情願的話,其實已經可以歸類落去做性暴力。

見到你亦都有講,又一開頭半推半就進行發生性行為,去到你決定要打hpv疫苗,係等嘅過程當中,似乎男朋友都不太尊重你,而一啲嘅說話都令到你感覺好唔舒服 。 如果喺過程當中,你有嘗試嘅直接表達自己嘅感覺同訴求,而男朋友嘅反應都係依然一樣不太尊重你 ,係咁嘅情況底下呢一段嘅關係感覺並不健康。 如果係一段關係裏面溝通嘅方法,並不能傳達到 雙方嘅意願而達成共識,長遠嚟講呢一段亦都不是一段健康越長久嘅關係。

係一段關呢講,對對方好其實係基本。 問題係對對方好係咪就足夠呢? 對對方好嘅方式係咪得一種呢? 喺開始拍拖前唔交代清楚自己嘅 過往、好大男人、唔尊重你, 好似你所講,可能就係佢咁多段戀情都失敗嘅原因。 有好多時候,我哋嘅思想仲喺度糾結係咪應該繼續同呢個男人繼續拍拖,但係其實你嘅身體已經講咗畀你聽最適合你現在嘅答案。 而當你好清楚感覺到,你有性恐懼,亦都打算以後都唔再接觸男人,唔再拍拖,覺得性係一件好污糟嘅事…其實呢啲就已經係你身體比緊你嘅反應㗎啦。 聆聽你嘅身體,聆聽你嘅感受,愛護自己的身體,勇敢地向不舒服嘅行為說不!

心理輔導係一個途徑,可以幫助自己重新擁抱勇氣面對自己驚嘅事情, 同樣地,聆聽你身體嘅需要,如果你嘅身體係同你講你需要心理輔導的話,即管踏出呢一步,去尋求協助啦!

最後都希望同你講,你並非過度憂慮,亦都唔會煩到我哋,唔好同我哋講唔好意思。我哋好開心你願意喺呢個平台同我哋分享你嘅情況,等我哋係呢度 empower你。 如果你唔介意的話,可以繼續喺度分享你嘅情況同感受,我哋好樂意喺呢個平台同你繼續傾計,陪你度過。但係如果有啲情況你覺得比較隱私的話,我哋其實有whatsapp或者signal係可以提供您隨時有任何情況都可以同我哋喺嗰度分享。

1個讚

係d私家診化驗所做呀,但係衣加諗落好似都係自己去驗DNA+打hpv針會比較適合。

多謝你既支持同開解,令我有被接納的感覺。我會好好處理自己既事同好好去面對,有任何情況/有需要都會再搵你地。希望可以快d走出到個陰霾。

多謝你 :sob:

1個讚