13/2開始食避孕藥，依家都有啲副作用，琴晚頭痛得幾勁唔知係咪副作用黎，我以前可能一兩個月都會頭痛一次左右，所以都唔肯定係咪避孕藥造成，我對上一次性行為係21/2，如果依家停藥有冇問題
，會唔會導致懷孕？定應該食埋先？
你好。
唔知你係開始食藥之前有冇徵詢過醫生嘅意見呢？因為雖然事前避孕藥係香港唔係屬於醫生處方藥物，但因為藥物係透過人造荷爾蒙改變體內嘅自然荷爾蒙分泌週期，本身就唔係所有人都適合服用嘅。而且市面上亦有好多唔同牌子嘅事前避孕藥，每隻牌子所含嘅荷爾蒙種類同劑量都唔一樣，所以一般係服食前都建議先搵醫生做檢查，確保身體狀況適合食藥，同埋等醫生建議適合自己情況嘅藥物牌子。
初期服食事前避孕藥有機會出現一啲嘅副作用，例如係月經唔規則、乳房脹痛、嘔心、頭痛痛和情緒轉變等等，一般嘅適應期係三至六個月，但因為每個人嘅身體狀況都唔一樣，每個人所需要適應嘅時間長短都會有所唔同。而家你只係第一個月食藥，仍然有一啲副作用嘅出現都係常見嘅情況嚟嘅。
不過留意到你提及自己每一兩個月有頭痛嘅情況，唔知你有冇因此睇過醫生搵到係咩原因呢？如果係本身身體有長期病嘅狀況，有機會係唔適合服食事前避孕藥架。現時亦好難判斷到底係你一直都會有嘅頭痛，定係因為事前避孕藥而造成嘅頭痛。
你可以考慮去家計會診所預約求診，由醫生判斷一下你適唔適合繼續食藥，或者有無需要換另一個牌子嘅藥物。因為就好似一開始所講，市面上有好多牌子嘅事情避孕藥，即使一隻啱都唔代表係完全唔可以透過使用事前避孕藥去避孕嘅。
另外，有關想停藥嘅問題，唔知你係13/2開始食藥嘅時候係咪係月經頭5日之內架呢？因為首次食藥都會建議係月經頭5日之內開始，而且頭7日如果需要發生性行為都需要額外使用安全套。而如果唔係月經頭5日之內開始食藥，就會建議頭14日都需要額外嘅安全措施。所以如果13/2係你月經頭5日之內，原則上你21/2發生性行為時藥效已經係體內穩定建立，會有一定嘅避孕功效。而藥物本身係有抑制排卵嘅效果，所以如果你認為自己有需要停藥，原則上都係可以嘅。但如果13/2並唔係你月經頭5日之內，咁21/2，甚至現時，其實都係未夠14日。藥效雖然會有，但可能未來得及達到抑制排卵嘅效果，而精子一旦進入體內最長可以生存2－3日，所以就唔建議你現時停藥。你亦要留意一旦停藥後，身體就會恢復生育能力，變相你如果再發生性行為就要使用其他形式嘅安全措施去避孕以及預防性病啦。
（Intern同學 Tommy）
13/2 係月經嘅第一日啊，21/2係食避孕藥後嘅第一次性行為，咁嘅話係咪可以停？
如果係月經嘅第一日食避孕藥，但係21/2先發生性行為，因為已經過左5日
藥效已經係體內穩定建立，會有一定嘅避孕功效。而藥物本身係有抑制排卵嘅效果，所以原則上都係可以嘅。
不過停藥除左需要考慮懷孕風險之外，其實都有機會影響身體，所以我地都建議你停藥前先諮詢醫生嘅意見，例如以你嘅情況，都可以了解返頭痛嘅成因，同埋睇下係需要停藥定轉另一款避孕藥。
（Intern同學 Tommy）