(在線等)咁樣會唔會有bb

上一次黎m第一日係25/1 30/1黎完 5/2同男朋友有前戲 個陣男朋友陰莖好似輕輕掂到外陰個個位,唔清楚有無pre cum 然後到今日都仲未黎m 想問咁樣有bb嘅機率大唔大?到今日已經29日無黎m了 好驚

同埋全程係無插入去 只係出面掂到

呀原來上一次黎m係22號至27號 記錯左 平時都唔太準時但今次好似隔得突然耐咁 唔知係心理作用定點樣 而家好驚!

Hello

pre-cum,即係尿道球腺液,係陰莖受到刺激嘅時候會分泌嘅透明嘅液體,當中有機會含有少量精子。而如果陰莖分泌物(精液、尿道球腺液)同埋陰道/陰道口有接觸過,咁都可能會有一定嘅風險。但如果接觸嘅並唔係陰道口,咁風險就會相對比較低。

如果你唔肯定嘅,與其擔心,不妨進行驗孕去了解下自己嘅身體情況。驗孕係檢測身體有冇hCG呢種物質,而hCG係受精卵著床之後身體會產生嘅一種荷爾蒙。卵子受精著床需要6-9日時間。所以,性行為7日後驗孕,會得到初步結果;11日後驗孕,就會有相對比較準確嘅結果。你最後一次性行為係2月5號,距離而家已經超過11日,驗孕會有準確可靠嘅結果。你可以購買驗孕棒,根據包裝/說明書嘅指示進行驗孕。 :blush:

如果排除咗懷孕嘅可能性,就可以耐心咁等下月經出現。 :relaxed:

都想同你解釋返,月經係由身體幾個繁複嘅系統互相配合而形成,所以好容易受到唔同嘅身體環境因素影響,例如荷爾蒙分泌、飲食、壓力、作息、藥物等等。如果你最近休息得比較少,或者壓力比較大,可能月經都會因此受到影響。其實每人每次月經嘅情況(包括月經週期長度、流血日數、流血量、經痛程度等等)都可能唔同,正如你自己都話,月經「平時都唔太準時」。

最後建議你同男朋友每次性行為全程都要正確使用安全套;或者即使唔係發生陰道陰莖插入式嘅性行為,都可以考慮使用安全套,避免陰莖同陰道口接觸到而有風險。 :smiling_face_with_three_hearts:
(Intern同學:融融)

係輕輕掂到陰道口 但無入到去🥲 咁樣風險係咪都大?:sob:求回覆

首先體外摩擦係有懷孕風險嘅,不過由於你哋冇插入式性行為,因此懷孕嘅風險都相對低。

就好似我地之前咁講,陰莖係受刺激嘅時候會分泌尿道球線液,當中有機會含有少量精子,但係精子接觸到空氣後嘅存活時間好短,只有幾分鐘,同埋精子係接觸皮膚表面之後嘅存活率就會減低。

(Intern 同學:Coco Law)

好呀唔該曬你呀:sob:呢幾日都好驚