有個問題好擔心，唔知點解決好，求回答。27/02開始第一日食避孕藥，第一次食，去到今日4/03係第六日食。但今日係食之前發生咗性行為，以為食咗避孕藥就安全所以無用避孕套。之後上網睇翻發現要7日先有效，請問咁嘅情況需唔需要食翻事後，會唔會有機會懷孕？另外，每日食嘅時間唔係好定時，大根係3至5點依個鐘數，請問咁樣會唔會影響避孕功效？最後有時食完都會有啲肚痛，需要去廁所，但又唔算肚瀉，請問咁樣係咪都會影響避孕效果？謝謝
你好。正如你所講，開始食避孕藥嘅時候，首7天進行性行為係需要配戴安全套以防止懷孕風險。由於你係第6日食嘅時候發生性行為時無使用安全套，係有一定嘅懷孕風險，所以都係到建議你食返事後丸以進行緊急避孕。不過，只有單一荷爾蒙嘅緊急避孕藥可以喺同一週期內服食事前避孕藥，而且係必須經醫生處方，同埋服食時限係性行為後72小時內。如果決定服食，建議到家計會、母嬰健康院或私家診所經醫生處方 。
想問下你食緊邊款嘅事前避孕藥？如果係單一荷爾蒙嗰款避孕藥，對準時服用有嚴格要求，如果不定時服用嘅話，係有機會影響藥效。但如果係混合荷爾蒙嗰款避孕藥，相差就如你所講嘅一兩個鐘嘅話對藥效唔會有太大影響。
至於你話食左避孕藥後有輕微嘅肚痛肚痾，如果唔係一D好嚴重嘅痾嘔肚痛，就唔會影響避孕藥藥效。
係到都想問一問，你食避孕藥之前係唔係係月經週期頭5日開始服用？有冇諮詢過醫生嘅意見？因為唔係每個人都適合食避孕藥，所以都建議去睇睇醫生，了解自己嘅身體狀況。
如果想參考更多有關緊急避孕藥嘅資訊，以下係家計會嘅網址: 緊急避孕 - 香港家庭計劃指導會
另外提醒一下，如果想到家計會拎取緊急避孕藥嘅話，因為聽日星期日佢地唔開始服務，所以建議喺星期一盡早預約，以確保喺性行為嘅72小時內服用，呢個係家計會青少年保健診所嘅相關資訊: 青少年保健 - 香港家庭計劃指導會
(Intern同學 Tommy)
Hello感謝你嘅回答。我係食緊優悦，所以應該係混合荷爾蒙嗰款。我係月經第一日就開始服用，有睇醫生，由私家醫生開嘅。如果我係4號早上10點發生性行為，72小時計嘅話是否需要係7號早上10點前服用？另外，請問知唔知如果想攞緊急避孕藥，家計會會唔會處理咗先？之前打電話去預約，都無得預約即日
Hello! 單一荷爾蒙嘅緊急備孕藥只喺72小時內有效，所以要喺7號嘅朝早10點前食。當然，越早採取緊急避孕措施，避孕效果越好。其實一般來講，家計會都會盡快處理緊急避孕嘅case。但係因為疫情同埋政府政策嘅影響，所以唔能夠保證現時處理嘅速度。如果你已婚或26歲以上，可以透過家計會的節育診所直接購買緊急避孕丸，毋須預約。但如果你未婚且26歲以下，就要透過家計會的青少年保健中心電話預約購買緊急避孕丸。每劑的費用為港幣60至70元，不包括診症費（總共大約港幣300元）。根據唔同中心嘅開放時間同已有的預約, 開放預約的名額都會唔同，所以唔能夠保證能夠預約到即日。但你可以試吓打去唔同嘅青少年保健中心，睇吓有冇一間能夠預約到你心儀嘅時段。
因為你嘅情況比較趕急，如果唔能夠預約到7號10點前攞到事後丸，可以考慮急症室的服務。你可以去醫院管理局轄下的急症室或母嬰健康院登記求診，同醫生索取事後丸。費用為每劑港幣60至70元，不包括診症費。
如果你唔想經歷公營部門（急症室；母嬰保健中心）的漫長輪候時間，亦可以向普通科醫生或婦科醫生等私家醫生購買。你亦可以考慮去私家診所或醫院，但每間收費都唔同，行政費用通常界乎港幣280至1,050元。而緊急避孕丸的收費則界乎港幣200至380元之間。
希望以上嘅資料可以幫到你！