經前症候群/懷孕 分不清

持續幾天身體都異常乏力、疲倦;

返工坐低做嘢,亦容易心口作悶、作嘔,需要行去室外空曠地方先會比較舒服。

雖然我一向腸胃差,時不時都會出現類似跡象,經期亦唔準確;

但近日男友同我講開將來「有咗嘅處理方案」,諗諗下就變得好憂慮。

好似好大壓力咁,但又講唔出口,怕佢擔心埋一份,因為佢同我傾時已顯得頗panic。

平時同男友都有進行親密行為,每一次插入都有用套;

而近一兩個月進行嘅親密行為,則只限於體外完事,完全無放入我體內。

照理經期應該已經嚟咗,但仲未現血(好似自從二月中打完第一針就未嚟);

近日胸痛乳頭痛,肚仔又脹住(水腫?),便秘,頭重身輕,好容易累,心情亦好煩燥,覺得自已腫咗更加變得負面。

上網睇懷孕的症狀,好似中晒咁,又未嚟經;

一日未嚟,都好似抖唔到氣咁。

Helloo

多謝你同我哋分享你嘅擔憂呀,呢段時間辛苦你了。

呢度我都補充多少少資訊先,其實月經本身都受唔同因素影響嘅,例如最近呢個月有冇食過藥、飲食均唔均衡、生活定唔定時、情緒有冇好大起伏、壓力過大都會令黎月經週期變長/變短,甚至影響埋經血量同顏色,唔使太擔心。另外疫苗亦有機會影響我哋身體嘅免疫系統,而免疫系統改變亦會令荷爾蒙水平出現變化,因此有機會影響埋月經嘅規律&出血量。不過月經唔準嘅情況係普遍嘅,如果真係好擔心嘅話都可以考慮去家計會檢查一下,睇下有冇催經嘅需要(疫情關係都記得留意吓開放嘅時間);不過呢度唔建議自行催經啦,因為每個人體質唔同,坊間嘅催經方法未必適合每個人。如果月經比預期遲太多太多,醫生都有可能建議你返去覆診,因為可能關健康事。(文中都見你有提及身體唔舒服嘅情況,可能係體質影響到都話唔定。)

另外都聽到男朋友同你講嘅說話無意間都令你感到有壓力,好欣賞你為另一半着想同願意照顧對方感受呀,不過一段關係係兩個人嘅事,如果有啲說話好想講或者因為對方嘅說話令到自己有啲壓力/疑惑嘅話,其實都鼓勵大家拎出黎溝通,睇下大家關注啲咩再一齊商量合適嘅解決方案:raised_hands:t6:

而且都有見你提及自己同男朋友性行為嘅時候都有使用安全套嘅習慣,如果「近一兩個月」嘅「體外完事」都係喺有安全套嘅情況下進行嘅話,呢度可以放心先:+1:t6:;不過如果對方冇使用安全套體外射喺 陰部外 嘅話,精液有機會流入陰道構成懷孕風險。另外體外磨擦都有機會有懷孕風險,雖然風險比插入式性行為低,但精液同尿道球腺液都有可能直接接觸陰部構成風險。但如果唔近陰部嘅話都可以放心,因為精子需要精液嘅存在先可以生存到,而精液接觸空氣/衣物會蒸發,精子亦都會因此死亡,所以係冇風險嘅。如果真係好擔心嘅話呢度都建議無論咩形式嘅性行為都可以考慮使用安全套多一份安心:raised_hands:t6:

最後,其實經前徵狀&懷孕徵狀都只係一個參考,因為每個人體質都唔同,有機會係血液循環同疾病令我哋出現所謂「徵狀」。如果想知自己有冇懷孕嘅話,我哋可以進行驗孕。一般受精卵著床需要6-9日,所以性行為最快7日後驗已經可以有初步結果啦~而性行為11日後驗孕,已經可以話係準確&可靠。呢度補充多少少先,驗孕主要係檢驗尿液入面嘅hCG(卵子受精着床後身體會產生嘅荷爾蒙)水平。而坊間嘅驗孕棒準確度都好高,只要跟返驗孕棒相應嘅指示操作,喺有效時間內閱讀結果- 通常喺5至10分鐘內(以說明書所述嘅時間為準)- 基本上都唔會有大問題。 所以你可以根據對上一次性行為嘅11日後驗,以取得最準確嘅結果。如果顯示冇嘅話就真係可以俾自己放心啦係冇懐孕嘅:+1:t6:

有啲咩歡迎再上嚟問,糖不甩嘅大家都會喺度陪住你:)

你好
鳴,好感謝你
無諗過會有咁貼心嘅答覆,多謝你俾咁大嘅assurance我
你令我安心咗好多!
前日的起心肝,買咗棒做一做檢查
發現無positive result,都安心咗好多
雖然至今經期都未返嚟,
但我都會繼續以平常心面對,盡量放鬆情
非常感謝你詳盡且細心嘅回覆!
多謝你,疫情下要小心身體喔

2個讚