傾左一年,對方突然不讀不回

一年前係apps識左個男仔,一路都差唔多每日隔日都keep住有msg,有時會食飯,經歷過兩件唔開心嘅事都做到朋友冇話以後唔聯絡果啲,近呢幾個月少見左,只係食過兩次飯,但msg keep住都有傾閒談,一個月前仲有一齊去camp一齊訓,但去完發覺佢對我開始有冷淡,試過不讀不回,前星期同佢交收一部機,有少少爭吵,但我都主動say sorry同多謝佢幫我,跟住果幾日都有叫佢應下我,但又不讀不回,到而家佢冇應我十日啦,咁耐都未試過超過四日唔睬我架,我好傷心好驚佢之後都唔再應我,我又唔敢打比佢,唔知點做好呀。。。。我真係好鐘意佢

Hello~多謝你同我哋分享你感情方面嘅煩惱,知道你喺呢段關係裏面覺得受冷落,所以唔開心。如果本身日日都有傾開計,但係而家不讀不回十日,都真係會令人覺得好擔心嘅。

因為呢幾個月香港疫情變得嚴重,大家出街食飯嘅機會少咗,話題自然都會變得更少,所以對於你哋見面少咗我都覺得好惋惜。見到你話同佢一齊去完camp之後,佢嘅態度先至開始變得冷淡,甚至試過不讀不回,我諗具體原因可能喺個camp度發生。或者你可以嘗試回憶一下,你哋喺個camp度有冇發生一啲令對方覺得唔開心/唔舒服嘅事情?或者可以搵多啲線索知道點解佢嘅態度會有所轉變。

喺受壓抑嘅環境底下,人好容易變得敏感,所以可能會有爭吵嘅情況出現,而點樣處理爭執就係問題嘅關鍵。好欣賞你喺爭執過後有主動say sorry同埋感激對方嘅付出,係好好嘅一步。唔知你會唔會記得當時對方嘅反應係點呢?會唔會有一個可能性係對方唔滿意你嘅道歉,或者你嘅行為舉動未能夠回應到佢嘅需要,所以先至唔覆你呢?當然,佢唔覆你仲有好多其他可能性嘅,個人、家庭、事業嘅因素都有可能影響,所以對方都唔一定係特登唔回覆你嘅,有可能因為太忙,唔記得咗,或者畀煩惱困擾住等等,所以先未覆到你嘅messages。暫時係咩都未清楚嘅情況底下,唔需要太驚同太傷心嘅。

雖然唔知你佢嗰個男仔有冇確認到戀愛關係,但係如果你真係好鍾意佢,有時都可以試吓做主動,打電話畀佢,一方面俾佢知道你對佢嘅擔心,另一方面都係俾個空間同時間大家坦白咁去溝通。文字上嘅溝通永遠比唔上電話或者面對面嘅溝通。同埋如果你真係唔知道對方點解唔覆你,其實都可以勇敢啲去問佢,好過一直估估下,拖延落去。因為只有直接問先會知道對方真正想要啲咩,而點樣去平衡雙方想要嘅嘢,就係愛情最巧妙、亦都係最具挑戰性嘅地方啦!

愛情係一樣好複雜嘅嘢,每個人心裏面嗰把尺都唔同,無論我哋幾鍾意對方都好,我哋都無法強求人哋同樣咁重視我哋,所以了解清楚大家內心最真實嘅想法好重要。兩個人要保持良好嘅溝通有好多唔同嘅辦法,例如可以喺事前訂立一啲規則,確保冷戰唔超過24hrs, 或者講好每日幾點要互相聯絡/傾電話等等。希望你可以搵到最適合你哋兩個人嘅溝通模式,係愛情呢條路上面再擔驚受怕。:heart:

去camp冇發生過任何嘢呀,普通整嘢食,一齊訓咋。我say sorry因為係用文字嘅係IG度,佢已讀不回,跟住我再send佢都冇理我,我覺得好難受,雖然我地冇一齊過,但叫做比較親密嘅關係,就算唔能夠一齊,我都唔想無左個朋友,我諗佢可能覺得同我唔夾,再加埋交收嘅事更加唔想再傾,但我覺得唔可以咁不負責任咁走左去唔出聲,點都應該講下咩事呀嘛,唔夾咪做返普通朋友囉:sob::sob:我唔知可以點做啦,應該再等多陣先再send msg?等左十幾日啦

Hello​:smiling_face_with_three_hearts:都睇得呢個男仔對你來講好重要,而且佢冇覆你都好影響你嘅心情:sneezing_face:

喺字裏行間都見到你其實想同佢保持有聯絡嘅關係,無論係朋友定係親密關係。而且你都覺得佢唔覆你呢個行為好不負責任,應該有乜嘢諗法都可以同你講清楚,令你唔使咁難受。而佢冇覆你呢個狀況都維持左好多日,如果你真係好想了解佢嘅想法,而且都想表達你自己嘅想法,可以主動問吓佢發生咩事呀:thinking:可以以一啲較輕鬆簡單嘅對話開始話題,例如「我已經有好多日冇出街啦,你呢?」,「你呢排公司係咪都係work from home啊?」。比對方覺得你嘅關心並唔會為佢製造壓力,盡可能減低佢再已讀不回你嘅機會~之後慢慢開始講你對於大家係呢段關係嘅想法~最緊要係你明白你分享你嘅想法係有咩目的,可能你係想挽回呢段關係、提出做返朋友、表達其實你好鍾意佢、又或者令佢明白你嘅感受,因為你想搵返佢嘅背後原因好影響你講出自己想法時候嘅態度同埋意思,如果你係想喺電話同佢講,就更加需要睇清楚字眼上嘅表達,因為喺電話入面我哋睇唔到大家嘅反應同埋情緒,所以一旦文字上表達得唔夠清晰,就好容易造成誤會,對方有可能會錯誤地詮釋你嘅想法:sneezing_face:

其實如果將自己嘅想法擺喺心入面,對方好難知道,會好影響段關係。所以既然你係有明確嘅目標,你亦知道再係咁落去會對呢段關係,同埋自己嘅情緒造成影響,咁就要俾啲勇氣自己主動搵佢啦!加油:muscle:t2::muscle:t2::blush:

其實我已經好主動啦,我都主動send左幾日msg,但佢有時已讀不回,甚至不讀不回,平日會睇我嘅限時動態,但呢兩日都唔睇,我好想知佢究竟係嬲還是唔想再同我講任何嘢,都十日啦咩火都下了,我有試過講其他嘢,因為係先前托我幫佢買的,我問佢幾時交收,佢不讀不回我。。。

明白你而家心情一定好忐忑:cry:唔知佢諗咩,如果你想知佢係嬲定係唔想再同你講任何野,定係有其他可能性導致佢成日已讀不回,甚至不讀不回,其實除咗直接問佢,都好難有其他方法知道佢諗咩:thinking:因為你哋冇共同朋友,就咁睇佢ig story又未必會知道佢諗乜~都明白你已經做咗好多次主動,難免會萌生一個諗法:「自己會唔會太chur?」所以可能你自己都要俾定一個心理準備自己,最worse嘅情況有可能佢唔再覆你:sneezing_face:如果就咁樣你同佢都冇交代嘅情況下,失去左呢個男仔,你會唔會覺得好可惜?或者會唔會好後悔自己冇講清楚自己嘅想法?

我哋會喺度陪住你:smiling_face_with_three_hearts:

我而家係唔想連朋友都做唔到,佢平時冇post任何嘢,所以更加知佢嘅狀態,有時諗佢冇block左我係咪已經好好了。。你覺得我過多幾耐先再試下揾佢好呢?

其實好睇你覺得佢唔覆你呢段時間有咩感受,如果你好唔開心嘅話其實盡快知道結果,相信會對你同埋段關係都會好啲:sneezing_face:即係你都會想像到你隔幾多日唔搵佢,你就會越唔開心~所以可能等你心情準備好要面對佢有機會講嘅嘢,或者你都可能需要時間諗吓有啲咩想同佢講,你先去搵返:ok_woman:t2:

佢連我限時動態都唔睇,姐係連我嘅嘢都冇興奮再知:sob::sob:我只係想同佢做返普通朋友咋:sob::sob::sob::sob:爭在未block我,好想揾佢。。

Hello,好明白你而家嘅困擾,可能你覺得自己即將失去一段關係,所以好不安、有好多情緒。 :confounded:

無論係咩關係,坦承嘅溝通都係最緊要嘅。我哋之前都有幫你一齊梳理返,你哋之間係咪有咩誤會,或者誤解。亦都見過你好努力咁去製造話題/對話嘅機會(就好似你約佢交收咁)。如果你真係好想同佢講清楚你地嘅關係,講清楚你想同佢保持係朋友,不妨直接同佢講,你想同佢傾下,睇下你哋之間係咪有咩誤解。可能講清楚曬所有嘢之後,對於你哋雙方都係好事。 :wink:

不過關係當中除咗溝通之外,共識都係好緊要嘅。而每個人嘅標準同埋期望都會唔同,我哋好難強求其他人要完全依照自己嘅標準/習慣/喜好去做唔同嘅嘢。可能你明白咗呢樣嘢之後,對於關係、同埋點樣處理關係,會有唔同嘅睇法。 :blush:

例如,你可能想約佢當面傾,見下面講清楚,但可能佢會prefer用文字表達;又甚至話你想同佢溝通、想同佢保持關係,但對方未必想。有呢啲差異唔係你做錯咗啲咩,或者代表就一定唔好,只係可能係而家呢個階段,你哋對呢段關係嘅睇法唔係同步、唔一致。如果係咁,可能都需要太過強求、俾到太大壓力自己。 :relaxed:

明白呢段時間你會有好多疑惑同不解,有啲咩歡迎你隨時搵我地呀! :smiling_face_with_three_hearts: