我上一次黎m第一日係二月二十七日，大概三月五號完m。三月八號第一次發生性行為，男方試過有一下無套咁磨擦過外陰，但其餘時間都有套。
之後十一號都發生過一次性行為，佢曾經試過後入時想唔用套入（差少少就偷入咗）但我唔俾佢咁做，最後佢都有用套…但佢射完之後無即刻拎出黎，係裡面郁咗幾下先拎返出嚟…
我因為好擔心所以十二號下午去咗家計會食事後，但都好擔心會中咗。我睇app就排卵期係大概三月十二至十八，十二號食咗事後係咪相對安全咗少少…？
如無意外的話我應該三月三十一至四月二期間會m到，想知如果期間想驗孕應該幾時做好？
同埋我係度考慮緊之後都打避孕針/食避孕藥，等自己相對少啲擔心，請問邊款會好啲？
唔該晒
男性喺性興奮時通常會自動分泌尿道球腺液，當中都含有少量精子，所以體外摩擦都有懷孕風險。如果係男性射精後冇即刻抽出陰莖會增加懷孕風險，因為係男性射精後陰莖會變軟，安全套就會鬆脫，分泌物同精子就有機會流入陰道。但係發生性行為後120小時內服用事後丸，會抑制到排卵或者干擾受精，因此大大減低咗懷孕風險。
另外見你提到男朋友喺性行為期間曾經有嘗試偷偷地唔戴套插入，其實雙方係發生性行為時，應該係使用安全措施方面達到共識，即使係情侶關係都應該要就住依方面溝通，並尊重雙方嘅意願，所以你男朋友喺性行為期間嘗試偷偷地唔戴套依個行為並無尊重你嘅意願，建議你同佢溝通返依個問題
如果好擔心懷孕嘅話，你可以喺性行為嘅7日或者11日後進行驗孕，因為驗孕棒係透過檢測尿液中嘅hCG (人絨毛膜促性腺激素)含量，呢款激素會係受精卵著床後開始大量分泌，而一般受精著床呢個過程需要6-9日，所以係性行為後7日使用驗孕棒的話會有初步嘅結果。而係11日後或者預計經期嘅日子驗孕結果會更加準確。
避孕針同避孕藥都係荷爾蒙避孕法，都係通過注射/服用人造荷爾蒙嚟抑制排卵同改變子宮內膜令受精卵難以著床，兩者係正確使用的情況下都有99%成功率。呢兩種方法未必適合每個人使用，避孕針要係醫生評估你嘅身體狀況之後先進行注射(通常注射係臀部，一個月或三個月打一次);避孕藥有好多唔同劑量，所以建議都係需要醫生評估你嘅身體狀況，按照你嘅生活模式同埋選擇最合適嘅荷爾蒙避孕方法。你可以去家計會診所／母嬰健康院／部分私家診所得到呢啲服務，有需要就可以去預約。
家計會避孕藥資訊：
家計會避孕針資訊：
（Intern同學 ：Coco Law）
唔該晒你…咁我係咪聽朝就可以check下？定過多幾日先驗下會準啲？….
同請問食完事後到宜家條腰有啲酸係咪正常？
驗孕棒最快可以係性行為之後7日可以有初步結果，但係比較準確嘅時間都係預計受精時間11日之後。因為驗孕棒係透過檢測尿液中嘅HCG(人絨毛膜促性腺激素)含量嚟判斷有無懷孕，因為只有受精卵成功著床嘅女性身體先會會開始分泌HCG，通常著床時間就會係6-9日，所以通常7日就會有初步嘅結果，11日嘅時候受精卵已經完全著床成功，體內嘅HCG分泌亦都足夠，所以係11日之後驗會更準確檢驗出有冇懷孕。提提你驗孕之前記住先閱讀說明書，因為唔同牌子嘅驗孕棒喺使用上都有啲分別嘅。
有好多原因會導致腰酸呀！例如食完事後丸產生副作用有腰酸，腹痛，頭暈等等。服用事後丸後可能提前嚟月經，月經前都會有腰酸，腹痛等症狀。另外最近嘅生活作息，情緒同飲食呢啲都有可能係導致腰酸嘅原因。但如果長時間持續就要睇醫生，以確認是否身體出現問題。
（Intern同學：Coco Law）
1個讚
你好，我係23號自己用驗孕棒驗過一次，結果係negative,咁係咪理論上安全了？唔該你
如果你最後一次發生性行為係3月11號，23號驗孕嘅時候距離性行為已經過咗11日，如果你有根據驗孕棒包裝／說明書上嘅指示正確咁驗孕，咁個陰性結果係準確可靠嘅。
1個讚