服用避孕藥後無經期

你好,我對於服用避孕藥後經期嘅問題有疑問。我食緊優悦24+4嘅避孕藥,已經食到第三粒白色丸,但經期好似仲未到。雖然曾經有過一兩次懷疑係月經,但係唔確定係咪經期。嗰一兩次嘅狀況係好小血量而且感覺上同以往經期好唔同,個情況就好似完全冇嚟過M咁。味道、顏色、狀態都唔同,請問食完避孕藥之後係咪會冇經期?謝謝

Hellooo

呢度我都補充多少少避孕藥嘅資料你睇下會唔會清楚啲呀:raised_hands:t6:

其實佢主要係通過人造荷爾蒙抑制排卵,例如服藥期間子宮頸黏液嘅黏稠度會增加&內膜環境都會改變,從而達致避孕。喺藥物嘅影響下你並唔會排卵,因為避孕藥會令血液入面嘅荷爾蒙增加,當腦部sense到呢個情況嘅時候,就會判斷為你已經排咗卵,因為藥物令到你嘅荷爾蒙狀態同排卵後嘅荷爾蒙狀態一樣,所以呢度都唔使太擔心呀:)

另外,服藥期間出現嘅「懷疑月經」其實係撤退性出血- 具體啲講,當我哋食晒含有荷爾蒙嘅活性藥物(24粒粉紅色藥丸)再食冇荷爾蒙成份嘅非活性藥丸(4粒白色藥丸),呢個轉換過程會令子宮內膜脫落導致出血。但當身體適應咗藥物之後「月經」會開始變得規律(不過初期有機會相對唔穩定)另外食完避孕藥都有機會出現經血量少嘅情況,呢個係正常嘅唔使太擔心,因為藥物有機會減少子宮內膜增厚嘅情況,經血量亦都因此變少。而且市面上有啲超低劑量荷爾蒙嘅避孕藥亦有機會導致所謂「停經」嘅情況,不過只要每日按時服藥,其實懷孕嘅機會都好低呀。

最後介唔介意同我地講下你食咗避孕丸幾耐?雖然避孕藥好容易喺市面買到,但係唔同牌子嘅避孕藥嘅荷爾蒙劑量都唔同。因此唔係每個人都適合,例如有心臟/腎臟/免疫功能問題嘅人就未必適合食。而俾醫生評估一黎可以睇下身體狀況係咪適合食/適合食邊款,二黎當你食嘅期間出現強烈副作用都可以同醫生商量返繼續食定係轉藥/停藥,始終搵啱適合自己嘅藥物都好重要啊,有啲人要轉幾次藥先搵到最適合自己嘅。