我3月1號第一日開始服用Yaz避孕藥，係第一次食避孕藥，嗰陣係月經第5日
食咗14日之後同男朋友有幾次無套性行為，佢都內射過
今日係我食第三粒白色藥丸，但係完全冇嚟M，淨係一直有類似谷M嘅感覺（胸部稍微脹痛、腹部不適、頭痛）
想問第一次食避孕藥係咪有機率會冇M嚟？如果冇嚟M就開第二包藥食係咪都會令到成個經期延遲？
每日都有準時下午6點食藥，淨係得一日遲咗3個半鐘食藥，想問係咪都會影響避孕效果？
Hello
首先解釋返俾你聽，現時市面上常見嘅避孕藥係通過服用人造荷爾蒙（雌激素加黃體素），抑制人體產生荷爾蒙同埋抑制排卵；同時都會改變子宮內膜嘅環境。而Yaz避孕藥暫時係市面上含有最低劑量嘅雌激素，好處係減低咗雌激素帶嚟嘅副作用，例如水腫、乳房不適；但低劑量嘅雌激素有機會令到服食初期子宮內膜增生不足，所以有機會出現月經血量好少／甚至冇月經出現嘅情況。如果你係正確服食藥丸，期間亦沒有任何嚴重嘔吐或者腹瀉，就可以避免意外懷孕嘅機會。
至於你有一日有漏食藥嘅情況，根據Yaz嘅說明書，如果漏食藥，只要喺24小時之內補食翻，並唔會失去避孕效果，所以呢一方面你都唔使太擔心，因為你喺3個半鐘之後就有補食翻
正常情況下，Yaz避孕藥係食完28粒之後唔需要等，即使月經未完／未出現，都要食新嘅一排。所以只要食完四粒白色之後嗰日冇嚟月經都應該繼續開新嘅一包服用。
至於冇嚟月經嘅情況下開新一盒藥會唔會導致月經延遲嘅問題，因為陰道不規則出血屬於服食避孕丸嘅常見副作用，所以你可以先觀察身體適應期（一般為三個月）有冇多次出現月經冇嚟嘅情況，或者身體有其他異常情況，有嘅話都應該向醫生諮詢意見。
希望解答到你
多謝你詳細嘅解答！
同埋我想知避孕藥啲副作用包唔包括偏頭痛同爆痘？因為食咗7日之後塊面瘋狂爆痘🥲爆到好犀利嗰種，最近先慢慢好返
而偏頭痛係今日先開始有，係一陣一陣嘅刺痛，想知係咪都係喺副作用嘅範圍內？
食避孕丸常見嘅副作用包括頭痛頭暈、覺得嘔心、陰道不規則出血、情緒起伏等，但一般情況下呢啲副作用都係出現喺服食避孕藥嘅頭幾個月，如果長期出現呢啲狀況就有需要去睇醫生啦～
至於暗瘡嘅問題，亦都有少部份女性會喺食避孕丸初期生暗瘡，但大部份女性都會因為避孕丸含有嘅雄激素平衡到令暗瘡出現嘅雌激素，令暗瘡問題改善。如果你嘅暗瘡問題持續，有可能係因為其中一啲避孕丸成份令你敏感，所以都建議你可以留意多一段時間，如果都有生暗瘡，或者皮膚敏感嘅情況就要去睇醫生啦～
今日嚟M了
但係佢顏色比未食避孕藥嗰陣淺好多好多，依家係幾乎粉紅色到淡紅之間
咁樣係咪所謂嘅「撤退性出血」？咁嘅顏色係咪正常嘅？
Sorry for太多問題
Hello
歡迎你問任何問題呀！好明白你第一次食避孕藥，可能會有好多嘢唔熟悉，有咩就隨時搵我哋呀！
正如我哋之前所講，避孕藥係人造荷爾蒙（包含雌激素同黃體素），喺服用緊避孕藥嘅時候，身體就唔會再產生雌激素同黃體素。所以，你見到嘅「嚟m」其實係「撤退性出血」，即係因為藥物控制（你食咗24粒有荷爾蒙嘅活性粉紅色藥丸，之後4日嘅白色非活性藥丸係冇荷爾蒙成份嘅，所以你體內嘅荷爾蒙水平下降咗）而出現嘅出血現象；並唔係之前冇食避孕藥嗰陣，因為每個月經週期內身體產生荷爾蒙變化、排卵而產生嘅「月經」。 
所以，食緊避孕藥嘅時候，「月經」流血量、流血日數可能會比你之前少，經血顏色同質地都可能有變化。如果冇出現較嚴重嘅副作用就唔需要太過擔心。 
最後都想了解返，你食藥之前有冇睇過醫生先？ 
雖然避孕藥好容易自己買到，但係市面上每款避孕藥含有嘅人做荷爾蒙成份同劑量都唔同。而且，唔係個個人都適合食嘅，如果有啲心臟／肝臟／免疫功能問題，咁就未必可以食避孕藥。所以，建議第一次食藥之前要諮詢下醫生意見，睇下自己嘅身體係咪適合、適合邊款藥。而且如果有睇醫生嘅話，當你有啲副作用困擾嘅時候，就可以同醫生講返，睇下係咪繼續服用俾身體適應下，定係轉另一款藥。
如果你之前未睇過嘅話，都可以考慮去家計會診所／母嬰健康院／部分私家診所預約睇醫生㗎。 
