上次m : 12/2
M後首次Sex day ：27/2（00:30）
驗左係有 ，去左家計會見姑娘初步計算係7週，
黎緊9/4見醫生（已經第8週）驚排埋期會過左10週
如果以sex day計就仲有2星期走盞
另外做終止懷孕成個過程要幾耐？疫情期間唔知男方又可唔可以陪伴。
想了解清楚
Hello
根據家計會終止懷孕服務嘅指引，家計會嘅醫生會評估需要進行終止懷孕人士嘅身體，睇吓佢哋適唔適合進行終止懷孕，如果胎齡超過10週、對需用嘅藥物有過敏、多個子宮肌瘤、兩次或以上嘅剖腹產子、貧血等嚴重疾病，家計會就唔會為該人士進行終止懷孕。
所以根據返你嘅情況，即使嚟緊9/4睇醫生已經係懷孕第八週，但如果經過醫生評估後，你嘅身體係適合進行終止懷孕嘅話，家計會都會安排服務俾你。而且照道理，你第一次到診，姑娘初步估計係七週之後，都安排俾你見醫生，就代表你嘅懷孕週期係合資格進行家計會嘅終止懷孕服務。但如果見完醫生發覺你嘅身體唔適合做終止懷孕，就會轉介你去公立/私家醫院。
一般而言，第一次到診姑娘會為你做基本嘅身體檢查，評估懷孕週數，講解避孕方法，亦都會有輔導員協助你了解自己嘅意願同埋選擇。第二次到診，你就需要決定繼續懷孕，定係終止懷孕，醫生檢查完你嘅身體就會安排你係家計會，或者轉介你去其他醫院進行終止懷孕。第三次到診就會係手術後嘅覆診。
有關做終止懷孕成個過程要幾耐，家計會提供嘅終止懷孕服務分別有手術，同埋藥物，都要睇返醫生評估之後覺得你適合邊一種嘅終止懷孕方式。
至於疫情期間嘅安排，呢方面都要睇返你嘅年齡同埋諮詢翻姑娘，但相信喺見醫生嘅期間都唔可以有其他人嘅陪同，至於如果係手術形式嘅終止懷孕，陪同者有機會只可以喺手術室門外等，未必能夠直接喺隔離陪伴整個手術過程。
詳細嘅終止懷孕方法，優點，缺點，同埋影響都可以參考返以下嘅網站～