計過岩岩好同男朋友去staycation撞正黎m 
有無咩方法可以延遲幾日
Hello
暫時除咗服食事前避孕藥，都冇方法可以延遲月經啊～但一般來講，事前避孕藥都需要喺月經頭五日服食，先會有最佳嘅避孕效果。但如果你已經嚟咗月經，就建議你需要去家計會或者其他醫院先諮詢醫生嘅意見，睇吓你嘅身體狀況，邊一隻事前避孕藥適合你，同埋有關於停藥嘅事宜。
而且，都唔建議你去仿效坊間一啲話食某一種食物可以提早/延遲嚟月經嘅方法，因為唔係每一個人都適合
如果本身都已經有食緊yaz 個幾日咁岩係無藥性，可以點樣 
Hello
如果你已經食緊yaz避孕藥，想你知道，其實食緊避孕藥期間嘅「月經」係「撤退性出血」，同唔係食藥嘅時候，因為排卵同身體荷爾蒙變化而造成嘅月經並唔同。避孕藥係用人造荷爾蒙去抑制排卵、增加子宮頸分泌物嘅粘稠度、改變子宮內膜嘅環境，從而達致避孕嘅效果。你食緊嘅24粒粉紅色活性藥丸係有荷爾蒙嘅，而嗰4粒白色嘅就係冇荷爾蒙成份嘅非活性藥丸。所以，你食白色藥丸期間，身體嘅荷爾蒙水平改變，就會有出血現象。 
如果你想延遲經期，理論上係要食完24粒粉紅藥丸之後，唔好食白色，繼續食新一排藥嘅粉紅色藥丸，直至到你想月經出現，就可以食白色藥丸。不過因為打亂咗你本身嘅服藥週期，你要有心理準備，可能之後幾次嘅月經週期都會受到影響。所以，建議你可以諮詢下醫護人員意見先，睇下點樣食藥／點樣食返白色藥丸會最適合你嘅情況。 
有需要可以盡快去家計會診所／母嬰健康院／部分私家診所問下醫生呀。 