成日擔心女朋友懷孕

女朋友上次嚟m 係3/3號,到今日6/4 都未嚟有啲擔心。過去我地呢個月發生性行為個陣我都會確保安全套戴好無移位,射完之後都會好快拎返岀嚟。唯一一次令到我驚係21/3 個次全程戴安全套,臨射的時候拎左岀嚟再除套射左係女朋友屁股上面,個陣覺得無咩事但而家佢遲左m會驚會唔會啲精液流左入去佢陰道入面。
不過女朋友嘅經期一向都唔太準亦都好難預計,所以每次都係我擔心多過佢擔心,自己亦唔想因為過份擔心影響左佢情緒。但係我地未到適婚年齡所以每逢佢經期前都會好焦慮。

Hello,其實如果你係有正確步驟戴安全套,以及全程都有戴足安全套,咁相信懷孕嘅機會係好微啊。但係呢你嘅情況精液都有機會流入陰道,同樣亦有機會造成懷孕。雖然精子暴露係空氣內好快會死亡,其實本身在屁股位置上射精嘅懷孕風險係唔高嘅,但係都見到你好擔心有可能肉眼見唔到嘅精液可能留到陰道口嘅機會。所以建議你女朋友進行驗孕。一般受精卵著床需要6-9日,所以性行為最快7日後驗已經可以有初步結果啦~而性行為11日後驗孕,已經可以話係準確&可靠。呢度補充多少少先,驗孕主要係檢驗尿液入面嘅hCG(卵子受精着床後身體會產生嘅荷爾蒙)水平。而坊間嘅驗孕棒準確度都好高,只要跟返說明書相應嘅指示操作,喺有效時間內閱讀結果,基本上都可以獲取可靠嘅結果。
其實有依足正確步驟戴安全套的話,其實無需射精之前抽出嘅。 一般安全套嘅設計係有儲精囊,所以係有顧慮到使用者射精之後先抽出。當然你都可以選擇戴安全套嘅時候,射精前都就已經抽出,咁就可以避免到安全套因為射精時衝力太大而破裂嘅風險,如果戴套前手指有按實儲精位置先開始戴套的話,呢個機會率本身都好微嘅。另外,有戴套嘅情況下突然抽出,其實都會有機會反而比單單使用安全套射精後抽出嘅風險大。因為好多人會於呢個突然抽出嘅過程中,無按住安全套開口位置就抽出,導致安全套意外甩左/殘留於陰道內,令安全套裡面嘅分泌物流出 。
另外,見到你有提及你哋都未到適婚年齡,所以每次月經前都好緊張擔心多過對方,其實你係咪覺得戴安全套嘅保護性唔夠?如果係有呢個擔憂,其實你哋可以考慮同時使用荷爾蒙式嘅避孕法例如:口服式的事前避孕藥或打避孕針,可以令到避孕提高,加上同時使用安全套嘅話除咗可以提高避孕功效,仲可以預防到性病或者其他疾病嘅傳播。另一方面,其實影響月經嘅因素都有好多,例如壓力過大、情緒有起伏、生活作息唔定時、飲食唔均衡、最近有服用藥物,都有機會令月經周期出現變化,從而導致月經嚟嘅日子同預期中嘅有差距。加埋你都有提及你女朋友本身月經週期都唔太穩定,其實今次暫時係比你哋預計嘅遲咗大概3日子左右,都唔算係一個太大嘅變動。就算冇發生過性行為,月經都未一定會喺預計嗰日出現 ,所以其實你唔使太擔心。同一時間,其實用荷爾蒙式避孕都可以令到月經周期變得規律,可能可以令到你減少到因為女朋友月經唔穩定而帶來嘅焦慮。
好欣賞你有為雙方嘅各種因素着想,唔想大家要面對未能承擔嘅風險而想努力做好預防措施。但你已經盡左你最大嘅能力,已經做得好好,唔駛俾太大壓力自己!見到你提及自己會比起女朋友更加擔心,其實你都可以同女朋友傾吓,問吓對方對呢件事嘅諗法,其實佢會唔會好擔心意外懷孕或者其他因為性行為而帶來嘅風險,或者佢對於你會感到擔憂有咩睇法,。性行為係喺大家都覺得安全、合適而且有共識嘅情況下發生先會令人覺得愉悅,如果每次事後其中一方都要提心吊膽的話,其實長遠來講對你哋嘅健康同關係都會構成一定影響。如果你哋唔會考慮用荷爾蒙式嘅避孕方法而又仲係好擔心發生性行為後可能有懷孕嘅風險,其實都可以認真考慮下現時係咪適合繼續發生陰道交嘅時機,會唔會暫時改或口交或者指交呢類性行為去減低懷孕嘅風險。直到你哋去到可以承擔可能發生嘅事嘅時候先再進行陰道交呀。

(Intern同學 Coco Lee)