我同左男朋友分左手半年。佢份人好恐怖，同我拍拖個時發生日左好多野…例如去左個啲Party，係咁食女。之後仲要鬧我，但最後我都原諒返佢。仲有好多就唔太方便講…
講返正題，佢就住係我樓上，佢知我每晚都會係我樓下跑步，佢特登係樓下捕我…有次仲要抆我頭髮話要好好傾下。
之後Whatsapp IG不斷騷擾我，仲話到自己好慘，每晚自己一個喊。佢啲朋友都有一齊鬧我，但係我跟本冇做錯啲咩…之後我頂唔順Blk左佢wts IG，佢竟然同Frd一齊用133同Send email比我。我真係好難受。
另外佢仲要去個啲IG直播，當住百幾人話我既不是，但佢講個啲都唔係事實…我屈住屈住係心入面又冇得解釋清楚。
我啲Frd好想鬧佢，但係我驚佢地話完佢仲變本加厲，得真係好無助，我宜家成個人好抑鬱…可以點樣解決。唔比佢煩…
你好 @HeiMo 
我相信你都處於一個非常之壓抑嘅情況下，相信你遇到呢啲事情都非常迷茫，但係都想話你知，依照你所講，你遇上嘅係恐怖情人，一般嚟講可以有以下方法應對嘅：
- 如果佢不斷whatsapp/IG騷擾你，都建議你換電話號碼同埋block咗佢IG，等佢搵唔到你，都唔建議你繼續使用以前嘅email。
- 至於佢再係樓下捕你，建議你態度明確咁再同佢講多一次你地已經分手，唔想再同佢有任何接觸。如果好似之前咁出現暴力嘅情況，一定要報警！係每次都要報警。
- 佢係網上講你不是，都想知道果百幾人都係你地嘅共同朋友？定係只係陌生人？無論如何，如果佢講一啲唔係事實嘅情況，而又有損害你嘅名譽，你係可以選擇控告佢誹謗嘅。
- 你一直無做任何事情表達自己嘅立場，反而係令佢變本加厲嘅原因。你需要話俾佢知道，當佢做呢啲行爲嘅時候，你係會唔舒服，會有行動，而唔係一直忍讓。
- 保留同收集任何騷擾你嘅證據，例如email、whatsapp對話、任何錄音、直播錄像，因爲呢啲都係警方立案需要用到嘅嘢，因此即使係網上或者電話騷擾，其實只要有證據，都可以報警求助嘅。如果真係告得入，甚至可以向法庭申請臨時禁制令禁止對方騷擾嘅行爲。
- 將件事講俾屋企人/身邊信任嘅人知道，如果發生咩事都有人照應。
- 最後，你可以就呢件事去社區中心搵社工求助。
我知道你無錯但係又要你做咁多嘢，會令你覺得好委屈同唔公平，但係如果佢嘅行爲已經好影響你，呢啲都係一啲必要嘅措施，明確咁話俾對方知道，你對呢啲行爲都係唔能夠容忍嘅。加油！糖不甩嘅我地會一直支持你架！