上次黎m係8/4 衣加仲未黎m
上個月period成35日先黎 但平時多數31日就會黎
14/3同1/4都有同男朋友做 有用套
但想分手 好想快d 黎m安心講分手
我已經買左驗孕棒打算11號check (追post話會準d)
本身8號有d好大撻既啡色分泌物 以前多數會即日黎m
但今次冇
呢幾日都keep住有d 同呢幾日胸痛胸脹
會唔會係有左/著床性出血 好驚 睡5著 
今朝忍唔住驗左 一條線 但仲係好驚
Hello。
明白月經遲左咁多日都未嚟令你好擔心。首先好欣賞你同男朋友發生性行為會使用安全套，其實如果檢查過安全套冇穿或者漏嘅情況，而且精液冇直接接觸陰道，其實意外懷孕嘅機會都好低。另外，明白你會擔心月經冇準時嚟係咪即係代表懷孕。其實每個人都有唔同因素會影響月經周期，例如錯誤減肥、心理壓力、生活作息同飲食習慣改變、服食藥物等都會影響荷爾蒙分泌，導致月經有可能提早或者延遲嚟，所以你唔使太過擔心導致比太大壓力自己。至於你有提到分泌物問題，陰道分泌物嘅情況會根據個人因素而異，例如性生活頻繁、藥物影響、心理壓力大等，都會影響分泌物狀況。
而著床性出血方面，一般只會係精子與卵子成功結合的情況下，受精卵會著床在子宮壁先會發生。，而出血情況通常只會有幾滴或者最多一塊護墊可以承載到嘅血量，而且係一次性，唔會持續地出血幾日。一般由受精到着床大概係性行為後六至九日就會發生，而着床性出血並唔係一個常見嘅現象，即使真係因為懷孕都係只有少部份女性會出現嘅情況。
另一方面，你提到近幾日都有D胸痛胸漲嘅情況。其實呢類情況係性行爲後出現都係正常嘅。性行爲導致嘅性興奮會令更多荷爾蒙分泌，導致内分泌變化。休息幾日，注意生活作息就冇問題喇。
最後，你有提到話買左驗孕棒打算驗。你追post講驗孕嘅資料係正確嘅。驗孕棒係透過檢測尿液中嘅hCG (人絨毛膜促性腺激素)含量，呢款激素會係受精卵著床後開始大量分泌，而一般受精著床呢個過程需要6-9日，所以係性行為後7日使用驗孕棒的話會有初步嘅結果。而係11日後或者預計經期嘅日子驗孕結果會更加準確～
（intern同學Alan）
想講返 由昨日開始 就流一些十分深啡色的血/分泌物 (深到好驚自己有病)
個量係要用m 巾 用唔到護壁
我分唔到自己開始左經期未 好驚係黎假m 其實係有左 定咩先前性流產
好擔心好驚
同其實最近壓力大 唔知有冇影響
如果你之前驗孕嘅時候有正確咁使用驗孕棒，咁4月10號嘅陰性結果可以肯定3月14號嘅性行為冇導致懷孕，同埋初步知道4月1號嘅性行為冇導致懷孕。而如果你真係好擔心嘅，你可以聽日再次驗孕，而如果結果依然係陰性嘅，你就要嘗試相信個驗孕結果，話俾自己知「我冇懷孕」。 
如果你所講嘅分泌物量係要用m巾嘅，就唔係著床性出血。而醫學上並冇「先前性流產」呢樣嘢。你係咪擔心緊係「早期流產」？如果係流產嘅話，出血量通常比較大，而且通常會伴隨下腹／下腰／下背痛。
正如我哋之前所講，壓力係會影響月經嘅情況。其實每人每次嘅月經週期情況，包括週期長度、流血日數、流血量、經血質地顏色、經痛程度同經前不適情況等，都可能會唔同。有時月經頭1／2日可能會有啲顏色較深／啡色嘅分泌物，係正常嘅。亦有可能係經血接觸咗空氣之後氧化，所以由血紅色變為深色。 
明白你有好多擔憂，好大嘅情緒壓力，希望我哋提供嘅資訊可以令你放鬆啲。如果你覺得搵醫生去檢查下自己嘅身體，同埋由醫生幫你驗孕你會覺得安心啲嘅，其實都不妨去預約睇醫生嘅。 
