避孕藥漏服補食一問

你好 我而家食緊第4盒yaz避孕藥
每日都係會大約23:00食藥
我喺11/4唔記得咗食藥
到12/4 23:00要食藥嗰陣先發現
所以補返 一次過食咗兩粒藥(11/4+12/4既藥)
想問我呢個情況叫唔叫超過咗24小時漏食?
同埋我咁樣做啱唔唔?需唔需要有另外安全措施?

另外我喺12/4亦有發生外射性行為
但我係處於漏食既狀態 咁樣懷孕風險會高嗎?
唔該你

另外我補食藥之後 今日起身身體比較攰
想知會唔會係一次過食兩粒藥既副作用?

Hello!

  1. 你呢個情況係超過咗24小時漏食。你10/4有食,但11/4冇食,12/4嘅2300先食返,已經超過24小時啦。其實你一次過食咗兩粒藥係做得啱,冇錯㗎,因為如果你漏食一粒,咁你應該喺記返起要食藥嗰陣時立即補食返你漏咗嗰一粒,然後再食埋你每日按時間食嗰粒避孕丸。加埋如果漏左食藥,係會建議除咗要即係食返藥之外,係之後7日內如果要發生性行為都要外加安全措施,因為俾返少少時間身體鞏固返藥效架。建議你可以嘗試設立鬧鐘提醒自己食藥,或者用一啲提醒服藥同記錄服藥狀況嘅APP,咁就可以盡量避免漏食藥嘅情況。 想問吓你12號嗰日喺性行為期間有冇用安全套?如果冇而你又擔心懷孕嘅話你可以喺120小時內睇醫生要處方嘅事後丸,雖然懷孕嘅風險唔算高,因為你淨係漏食咗一日藥。但係都建議你喺性行為七日後進行驗孕,先知道有冇懷孕。

  2. 其實如果你一向都有食開避孕藥,已經超過3個月以上,都唔洗太擔心嘅,因為避孕藥係透過人造荷爾蒙抑制排卵嘅,一直有長期穩定食藥嘅話,原則上身體係唔會有排卵嘅,咁就無存在危險期嘅情況。但係如果漏食藥嘅話,其實身體都會慢慢恢復月經週期嘅。當然你食咗比較長時間,身體都唔會咁快恢復返月經週期嘅,所以懷孕嘅機會都好低,所以唔需要太擔心。但係如果你係食咗比較短嘅時間,例如3個月內,藥效未必能夠係身體度建立到,因此都會有懷孕嘅風險。提提你如果每日都固定時間食藥,亦冇漏食藥嘅情況,即使係停藥期間發生性行為都唔會影響藥效。

  3. 可能因為你一次過補返食咗兩粒藥,藥過重,所以令到你個朝早起身比較攰,所以唔好太擔心。加埋其實食完避孕丸嘅副作用有好多,可能出現噁心、嘔吐、腹痛、疲勞、頭暈、乳房脹痛或頭痛但係真係記得下次唔好再漏食藥啦。

(Intern同學 Coco Lee)

多謝你詳細既回覆!

我仲有少少野想問。
知道排卵大約會係月經週期第14日
咁即係停藥都唔會即刻排卵?
咁點解漏食藥而當日有性行為 好似好危險咁
定其實懷孕風險好低 只係唔排除有機會?
唔該哂你!

首先,排卵嘅日子未必係月經週期第14日,14日係一個科學計算出嚟嘅日子,係講緊月經週期係28日嘅話就會係14日排卵,不過如果你食緊避孕藥就唔會排卵嘅,亦都唔會有安全期、危險期、排卵期,所以都無必要去記住呢啲日子架啦。

而且月經嘅出現其實係由身體繁複嘅系統配合而成,排卵同月經呢啲生理現象會受好多唔同因素影響,例如荷爾蒙分泌、飲食、作息、壓力、藥物等等,呢啲因素都會導致月經週期嘅長度同日期發生變化。除非你係醫生嘅指示下每日用排卵棒測試,否則都唔能夠好準確咁知道邊一日排卵。

的確漏食當天身體依然都會有藥效,懷孕嘅風險好低,但係因爲避孕藥嘅其中一個功效係用一啲荷爾蒙去抑制卵巢排出卵子,而當停咗避孕藥之後就唔會再有荷爾蒙去抑制排卵,因此卵巢隨時都有可能排出卵子,爲免出現意外懷孕嘅情況,通常都會建議大家係記起自己漏食藥物當刻就即時補食一粒,之後果粒都照正常嘅時間食返。

1個讚