小妹而家十七歲，仲差差唔多半年先十八。前排下面有好濃烈嘅異味，但分泌物顏色同狀態正常，後來用女性私人部位嘅清潔劑洗幾日就冇事。之後呢兩三日痾尿嗰陣下面痛，普通坐係度同行路都會覺得下面有d唔舒服。沖涼嗰陣摸過，係入少少嘅位置有唔舒服（有d痕同痛）
有同過男朋友進行性行為，每次都有用condom，做完都會用紙巾抹下下面或者沖下面
而家考慮緊要唔要自己去睇婦產科check下咩事 同埋都想知咁嘅情況係咪正常
但我唔想俾屋企人知
如果自己一個去睇婦產科會唔會一定要家長陪同？或者就算可以自己去，會唔會通知家長
你好呀 @Vvvvv719 
都想知道多少少，你啲異味係點樣架？係好似魚腥味咁樣？你有講到會有痕癢同埋排尿嘅時候有痛嘅情況，有可能係細菌性陰道炎，當感染後，通常分泌物都會係白灰色同比較水狀，你可以留意下係咪有相同情況呀。 
有可能係汗水或者尿液混合埋一齊引起嘅味道，近排天氣比較熱同埋潮濕，有可能係因爲悶熱引起嘅，汗水同尿液都會有細菌，都會有可能引起痕癢嘅狀況。好欣賞你喺性行爲之後都會清潔下體，都會令細菌唔好殘留。 
另一個原因係因爲過度沖洗陰道，包括使用一啲私人部位嘅清潔劑，因為清潔嘅時候用比較鹼性嘅清潔產品會改變陰道或者陰道口偏酸性嘅環境，當酸鹼平衡受到影響，就會比較容易受到感染，建議每日使用清水溫和溫柔地清潔陰部就可以架啦。 
你可以自己去婦產科檢查架，唔會需要家長陪同嘅，醫生亦都唔會通知家長，一嚟佢無你屋企人電話，二嚟雖然醫生都會有可能問及性行爲狀況，但你已經超過咗香港女性合法嘅陰道交年齡（16歲），因此醫生只係循例問下，亦都唔會同屋企人講，你可以放心呀。 
因爲你已經有初步嘅症狀，除咗睇婦科，都可以去普通科門診見醫生嘅，價錢會比專科相宜，你都可以去家計會診所見醫生，不過就需要預先預約啦。 