你好，為左調經，剛剛在第一日經期到時開始第一次食24＋4既避孕藥，但食食下有啲問題想問。
我睇說明書，話食到第4粒非活性成份藥丸（白色藥丸）期間就會來經，但我經期平均週期一般為35~40日，如果我食到第4粒非活性成份藥丸（白色藥丸）都還未來經，我應該如何繼續療程？照開一盒新藥？還是再等下一次經期第一天才開始一盒新藥？因為我現時食左藥後經期到了第14日還未完，所以預計食到第4粒白色藥丸時應該還未會來經。
其實除了新開始第一盒藥是經期第一日食外，係咪之後新開盒既藥唔一定係經期第一日食？唔理週期係咪28日，一直28日後開新藥就可以？謝謝
你好，都想了解返，你食藥之前有冇睇過醫生先？ 雖然避孕藥好容易自己買到，但係市面上每款避孕藥含有嘅人做荷爾蒙成份同劑量都唔同。而且，唔係個個人都適合食嘅，如果有啲心臟／肝臟／免疫功能問題，咁就未必可以食避孕藥。所以，建議第一次食藥之前要諮詢下醫生意見，睇下自己嘅身體係咪適合、適合邊款藥。
留意到你話邊月經第一日開始食藥直到而家已經嚟咗月經14日，想了解多啲呢段時間你月經嘅情況係如何？血量係好似一般月經咁多，定每日都係少量出血？如果一直都係好似一般月經咁多而你食藥之前都冇特別徵詢過醫生嘅意見，都會建議你約見醫生檢查一下身體，確保自己係適合食藥嘅。可以考慮去家計會診所、普通時間門診或者婦科診所見醫生。
但如果每日都係少量出血咁都唔需要太擔心，因為服用避孕藥嘅其中一個功能，係幫助我地調整經期。透過控制體內嘅荷爾蒙含量，令我地嘅經期調整作28日嘅月經週期 。服用初期，可能身體喺適應階段時，會出現不規律嘅陰道出血，或者月經週期日數會比較唔穩定。但係隨著慢慢適應，經期一般就會變得穩定。一開始食藥嘅時候，月經未必會係最後4粒非活性藥丸之內嚟，但慢慢適應藥效後，月經週期同嚟月經嘅日子就會變得規律。所以都無需太擔心服用避孕藥後，會長期影響月經週期變得唔穩定。
除左第一次服食避孕藥需要係月經第一日食用，完成整個療程，之後再開新藥，月經有冇黎，都需要繼續keep住食，以維持藥效。若中途停藥，就會失去藥效。
所以你話嘅：「唔理週期係咪28日，一直28日後開新藥就可以」係正確，食完28天嘅藥，之後嘅下一天就需要開新一包嘅藥keep住服食。
（intern同學 Tommy）
多謝你既解答，我就係睇完婦科醫生，醫生提議我食避孕藥調經，本身經期都比較長，但14日都未完真係第1次，不過幸好流量比平時少。
係到補充少少諮詢，希望令你安心啲。
點解你會有少量出血？因為呢啲都係初期
服食避孕藥時常見嘅副作用。期間身體適應緊藥物，有機會有少量子宮內膜脫落，所以月經未必會好規律，亦有機會出現經期間點滴出血。理論上3個月左右後，身體習慣咗藥效，月經就會穩定，不過有啲人嘅身體可能需要相對長少少時間去適應，例如6個月，甚至有人要試過幾款藥之後先搵到最適合自己嘅藥。所以如果冇特別嚴重嘅副作用就唔需要太過擔心。
（intern同學 Tommy）