好驚女朋友有咗

同女朋友做咗兩次(都有用安全套)
第一次係上個月m到嗰陣時,啱啱嗰次係上星期

第一次我係冇射到,所以應該冇事?

啱啱嗰次就有少少驚
原因係做做下嘅時候發現安全套有些少褪咗出嚟
當時仍未射精,而且亦都盡快掹返出嚟同換一個安全套
之後真係射咗嗰陣,女朋友亦都有檢查保安全套冇穿

但女朋友同我講呢幾日子宮脹痛同有出血
所以我都有啲擔心係咪有咗

求意見🙇🏻‍♂️🙇🏻‍♂️🙇🏻‍♂️🙇🏻‍♂️🙇🏻‍♂️

Hello。

好欣賞你做嘅時候有用到安全套,而關於你地第一次性行為嘅問題,其實男性並唔係只有射精嗰啲液體先含有精子嘅。男性性興奮/受到刺激後,即係話一開始做個時已經有機會會微量釋出尿道球腺液(透明黏稠狀嘅液體),當中都含有少量精子,假如冇做好安全措施,係有一定嘅懷孕風險嘅。不過你都提到有戴到安全套,如果係喺整個性行為過程中都有佩戴安全套,咁第一次性行為嘅懷孕風險偏低。

而關於第二次,如果做嘅時候安全套甩咗一半,陰莖都有可能沾有少量精液,如果過程中冇直接接觸到陰部,風險都比較低。都見到你有提及射咗精之後,有檢查安全套有冇穿窿嘅情況,冇嘅話都唔需要太擔心。另外你提及女朋友呢幾日有子宮脹痛同出血,都想問吓出血嘅情況係點樣,例如顏色,同埋血量。因為子宮脹痛同埋流啡都係一啲月經前會出現嘅症狀,你都可以問吓女朋友之前有冇試過喺月經之前出現呢啲情況。如果出血量較多,有可能係性行為嘅時候造成陰道撕裂,或者潤滑劑不足導致陰道有傷口,造成嘅出血,呢個情況嘅話就需要諮詢返醫生。如果真係擔心意外懷孕嘅話,可以同女朋友商量之後,考慮進行驗孕。

(Intern同學 Alan)

1個讚

佢話有少少血塊咁,同埋流咗兩三日,依家已經冇血

呢一種出血嘅情況大多數有兩個可能性,第一係着床性出血,第二係排卵期出血。

  1. 著床出血係指當受精卵着床喺子宮壁嘅時候有機會造成嘅少量出血,通常只會有幾滴或者最多一塊護墊可以承載到嘅血量,而且係一次性,唔會持續地出血幾日,血嘅顏色亦會同月經嘅唔一樣。一般由受精到着床大概係性行為後6至9日就會發生。而着床性出血並唔係一個常見嘅現象,即使真係因為懷孕都係只有少部分女性會出現嘅情況。

所以如果你出血嘅日子距離你發生性行為已經超過9日,又有持續地出血,顏色亦同平日月經差不多,咁基本上都可以排除係着床性出血嘅可能性。

  1. 有啲人有時會經歷排卵期出血,係因為體內荷爾蒙發生變化,導致有少量子宮內膜脫落。所以會有啡色/帶血嘅分泌物,不過個流血量相比起平時月經會比較少(通常血量係用護墊都已經可以),而流血日數都會比較短。有啲人排卵期出血係排卵嗰日出現,而有啲人會排卵前後幾日都有出血。同埋的確有人會喺壓力/身體狀況/藥物嘅影響下,出現排卵期出血嘅情況。

如果之後都時常出現非經期陰道出血,同埋血量都比較多,咁都可以睇下醫生檢查下有冇一啲病理性嘅原因(例如荷爾蒙水平問題,子宮頸問題)導致呢個情況出現。如果有需要,你可以去家計會診所/母嬰健康院/專科診所預約睇醫生嘅。

感謝各位解答

多少少update🙇🏻‍♂️🙇🏻‍♂️🙇🏻‍♂️
啱啱同佢出去嗰陣突然之間子宮脹起同埋痛
但係過一陣就冇痛同埋冇再脹

想問下糖不甩知唔知係乜嘢原因?
會唔會真係有咗?

Hello
明白你好擔憂,但係暫時冇任何一種症狀係可以準確咁判斷有冇懷孕。如果想知道女朋友係咪懷孕,唯一嘅方法就係進行驗孕。

驗孕係檢測身體有冇hCG,一種受精卵著床之後身體先會產生嘅荷爾蒙,而卵子受精著床需要6-9日時間。所以,喺性行為7日後驗孕會有初步結果,11日後驗孕就會有相對比較準確嘅結果。你哋可以睇返最後一次發生性行為嘅日期,計算日子進行驗孕。 :relaxed:
可能轉眼見到個驗孕結果,你哋都會安心啲。而如果驗孕結果係陽性,我哋都會陪伴著你去面對。 :sparkling_heart:

下腹部位脹痛嘅原因可能有好多種,例如荷爾蒙影響、經前不適、甚至情緒緊張。如果呢排女朋友都有經歷下腹脹痛同埋非經期出血,不妨去睇下醫生檢查下,了解下佢嘅身體情況,睇下有冇啲病理性嘅原因導致呢啲情況嘅發生。有需要可以盡快向家計會診所/母嬰健康院/部分診所預約睇醫生呀。 :woman_health_worker:t2: :man_health_worker:t2: