唔知點解，我同男朋友好多時搞搞吓佢中途都會軟左… 初初我都喺度諗究竟係咪我自己問題… 係我身材唔夠好？定係我嗌得唔夠？但係耐左，我發現佢次次一開始都好勁，好有性慾，但係去到咁上下就會好攰，要唞一唞先可以再嚟過…但係其實自問我都已經唔係「死魚」…我可以調返轉做主動，但係每次當我想幫佢，佢又會軟…重重複複…究竟點解會咁樣，不過如果我肯等佢，佢再努力下，其實佢係可以射到，但係如果次次都係咁，我真係唔知點算 
Hello 好多謝你信任我哋同我哋分享你嘅經歷，相信你都經歷過唔少情緒壓力。 
首先想你知道，性行為其實係好需要兩個人嘅共識、溝通、探索同埋配合嘅。所以千祈唔好有咩事就即刻諗「究竟係咪我自己問題」。可能好多時候我哋容易見到嘅嘢，例如色情影片、社交媒體內容、網上論壇討論或者影視作品，都傳遞緊某啲資訊，例如女性一定要身材好、性行為要好主動、要隨時「取悅」對方，先可以得到性歡愉同個人價值。我哋知道事實並唔係咁樣，但係呢啲經過修飾剪輯嘅資訊就會令到我哋有頗大嘅壓力，對自己嘅身體、性、同埋其他嘢都有好多嘅不安同埋焦慮。 
同樣道理，我哋可能都因為咁樣而對男性、男性嘅身體、男性嘅性有啲誤解。主流資訊可能會令我哋覺得男性要持久、性行為一定要射精先叫做完成。但係其實每人每日嘅狀態同環境都會唔同，喺性行為嘅表現同喜好都可能會唔同。 
同埋都想講少少關於勃起嘅資訊你知，勃起係陰莖受到刺激之後，海綿體空腔充血，陰莖脹大同埋變硬嘅現象，係由神經、血管等一系列複雜因素配合後出現嘅結果，所以會受到好多唔同嘅因素影響，例如當日疲勞程度、身體水份、精神壓力、環境、刺激情況等等。而當神經活動消退、血流改變，勃起情況都會消退，即係「軟返」。
你可以嘗試問下男朋友，佢平時有冇自慰嘅習慣。佢自慰嘅時候有冇中途軟嘅情況？ 
自慰可以係一個好好了解自己身體、探索自己喜好嘅過程。如果佢平時自慰冇呢個情況，咁你哋都可以討論下，佢平時自慰嘅喜好同習慣係點樣？有邊啲部位敏感，接觸到會令到佢舒服？鍾意點樣嘅頻率同強度？ 
同你發生性行為可能個刺激同佢平時自己自慰好唔同，所以產生嘅刺激亦會唔同，甚至可能佢有緊張嘅感覺，都會影響勃起嘅狀態。你哋可以嘗試溝通下彼此嘅喜好，試下下次再發生性行為嘅時候營造一個令你哋兩個都覺得放鬆、享受、舒服嘅環境，可以係調節下燈光、可能試下用香薰、可能係播住音樂。然後慢慢去發掘令到雙方都舒服嘅行為。有時充足嘅前戲都有幫助嘅。 
可能呢個都係個機會比你哋思考同溝通下，點樣先為之令你哋舒服嘅性行為？需要幾多親吻同撫摸？親吻同撫摸邊啲身體部位會令你／佢舒服？係咪一定要插入式？插入之後係咪一定要男方射精？射精之後呢？釐清呢啲嘢、溝通同埋有共識，可能都幫咗到提升你哋嘅性歡愉。要提提你，喜好可能隨時會變，所以呢啲溝通唔係一次就夠嘅。每次發生性行為（發生前、中、後），都可以係一次探索同溝通嘅時機。都想推介一個instagram post俾你睇，希望幫助到你哋思考呢啲問題。
而如果男朋友平時自慰都有呢種中途疲軟情況，或者經過一段時間嘅嘗試，佢喺性行為嘅時候都會中途疲軟，而且呢樣嘢對你哋做成困擾。你哋都可以嘗試搵下專業協助，例如醫生或者性治療師，睇下有冇啲病理／心理因素影響咗。 
有其他問題歡迎隨時問我哋呀 
你男朋友有打飛機習慣，