係我太封建?

試過自慰嗰陣如果覺得舒服真係會不自覺嗌出嚟
其實我都唔知應該算係舒服定太敏感
總之就係發出聲音嘅話就會覺得羞恥

Hello,其實每個人,不論性別,都會有機會有性需要,亦有機會會自慰。而每個人自慰嘅原因都唔一樣, 除咗滿足性慾,亦有人係會為咗減壓或者令自己好瞓啲而做,所以本身自慰呢件事都係好中性同平常嘅。每一個人感受到性刺激或者性歡愉嘅過程都會有唔同嘅方法同反應,有人會身體抽搐、有人會聲音、亦有人會無特別大嘅反應,每個人有唔同反應都係好正常。同係咪「封建」或者所謂「開放」係無關係架~
都好想問吓你點解會覺得自慰過程/感受到性歡愉時發出聲音係一件羞恥嘅事?會唔會係有聽過類似嘅評論或者見證過有人因為發出聲音而被批評?

社會對於性仍然係有好多污名同批評,好多時都會聽到唔同嘅言論,有時都會令人質疑自己有性需要或者係性行為期間嘅表現係咪「正常」,甚至會擔心如果自己表現得對性有興趣係一件負面嘅事。但其實人有性需要係一件好平常嘅事,而每個人所需嘅程度都唔一樣,需要嘅方式亦會有所不同。但只要係一個安全嘅地方度進行,喺冇影響到他人嘅情況下,以自己喜歡嘅方式進行性行為都係冇問題嘅,而係過程中所表達出唔同嘅反應都係冇問題㗎。而係自慰過程中我哋亦可以更加了解自己嘅身體,感受自己同身體嘅連結,自己愉悅同享受最緊要。

(Intern同學 Coco Lee)