食藥同戴套嘅避孕成效

你好呀,我知道食事前避孕藥已經有好高嘅避孕率,戴埋套就更安全添,但網上有人話就算佢哋食藥同戴套都唔小心有咗,想問下究竟有咩原因導致咁? 定係佢哋所謂嘅食藥同戴套係無同時使用,定係佢哋係啲藥食下唔食下,所以降低咗個避孕率?

Helloo

多謝你同我哋分享你嘅擔憂啊:) 呢度都等我補充多少少安全套&事前避孕藥嘅資訊,睇下會唔會釋除到你嘅疑慮:raised_hands:t6:

(sorry有啲長:rofl:

關於安全套,建議使用前可以睇下佢嘅包裝有冇破損&過期,而使用過程中需確保避孕套冇穿並且緊貼陰莖,因為甩咗嘅話精液可能會接觸到陰部構成懷孕風險;另外過程中如果欠缺潤滑都可能會令個套更加容易穿㗎,呢度都建議如果覺得乾嘅時候可以配合潤滑劑保持潤滑。而射精後建議盡快將陰莖抽出,因為過程中陰莖會變軟變細,令到安全套好容易移位令精液漏出,抽出嘅時候亦都可以㩒實安全套底部周圍確保精液唔會漏出/甩套/移位,使用安全套係完美使用嘅情況下,其實佢嘅避孕成效都已經有98%㗎啦:+1:t6:

關於事前避孕藥,其實佢有分兩隻嘅- 單一&混合荷爾蒙- 一般婦女多數用混合荷爾蒙避孕丸,而單一荷爾蒙避孕丸則比較適合餵哺母乳嘅婦女使用。

佢哋嘅基本原理係透過人造荷爾蒙抑制卵巢排卵&令子宮內膜產生變化,子宮頸分泌物亦會變得黏稠令精子難於穿過黏液受精卵就無法著床。

另外,相對單一荷爾蒙,混合荷爾蒙避孕藥要求會冇咁嚴格,遲個半鐘/半個鐘食係冇問題的:)(如果驚自己唔記得食嘅話可以用手機app提醒自己以防漏服)

食法方面,只要經期頭5日食藥就即時有效,而且喺呢段時間內開始服食都會比較容易令月經周期變得規律。但係如果係月經第 6 日or之後先開始食避孕藥,就需要喺頭7日內再配合其他非荷爾蒙避孕嘅方法,例如安全套。 雖然一般我哋都建議即使喺月經期間開始食藥都需要係頭7日配合埋安全套,因為如果你係第一次食藥嘅話可能會有唔同嘅身體反應例如嘔吐,其實就已經將藥物排出左,咁就冇效㗎啦~ (食完之後嘅2-3小時內出現 ),因此我哋都會建議頭7日要額外使用安全套嘅。

另外,如果係24小時之內漏服有效藥丸,一旦記起就應該儘快服食,並喺下次按正常時間服藥。如果超過24小時仍未服用任何含有效成分藥丸,避孕藥的效力可能已降低。建議之後兩星期都用返避孕套,

此外,如果你係近排先開始食事前藥嘅話,身體都需要大概3至6個月嘅時間去適應藥物先會有穩定藥效呀-服用初期可能會有噁心、頭暈、頭痛、乳房脹痛、水腫及情緒轉變等副作用出現,但一般會喺數星期內消失,始終都要比身體適應藥效,同埋每個牌子劑量不一,如果擔心嘅話都可以諮詢下醫生,睇下依家食緊嗰隻係咪真係啱自己,另外服用期間唔建議自行停藥/轉藥,做決定之前最好先諮詢下醫生。只要完美使用事前避孕藥- 包括食藥前徵詢醫生意見確保適合食藥、每日定時食藥並冇出現嚴重副作用、每年進行身體檢查確保身體適合繼續食藥等等- 佢嘅成效已經高達99.7%㗎啦~

相信聰明嘅你已經發現呢兩種避孕方法即使喺完美使用嘅情況底下,都冇可能去到100%,因為現時冇任何避孕方法可以達致100%嘅避孕;調返轉即使係不安全性行為都唔代表100%會懷孕呀,而你所提及嘅情況有機會出於以下原因:冇regular咁食/出現嘔吐等副作用/藥物過期/身體出現狀況,呢啲都有機會影響藥物嘅效力;另外安全套方面可能係過程中穿咗但佢冇留意(可以事後做注水測試睇吓有冇漏水確保佢冇穿)/size唔啱/過期,都有機會導致精液流出增加懷孕風險。

不過只要平時有留意&做足安全措施,其實都唔使太擔心:) 懷孕風險真係極極極極極低。但如果真係想安心啲嘅話都可以考慮:1)之後任何形式嘅性行為都配合返安全套 & 2)進行驗孕,一般受精卵著床需要6-9日,所以性行為最快7日後驗已經可以有初步結果,而性行為11日後驗孕,已經可以話係準確&可靠。呢度補充多少少先,驗孕主要係檢驗尿液入面嘅hCG(卵子受精着床後身體會產生嘅荷爾蒙)水平。而坊間嘅驗孕棒準確度都好高。

只要跟返驗孕棒相應嘅指示操作,喺有效時間內閱讀結果- 通常喺5至10分鐘內(以說明書所述嘅時間為準)- 基本上都唔會有大問題。如果結果係陰性嘅話就可以放心啦係冇懷孕嘅。

希望解答到你啦:raised_hands:t6:

1個讚