會黎M嗎?

破咗處會唔會黎M架!我真係好想知,但係又唔知咩係咪有咗因為我冇帶套(我冇內射)射之前10秒已經出咗黎!我而家好驚啊點算好:cry:

正常安全性行為(例如:食事前避孕藥、正確使用安全套)係極低機會懷孕。 不安全性行為會有極高機會懷孕(例如:無套性行為、外射),就算無射精入陰道裏面,都會有極高機會懷孕因為性交期間陰莖會分泌前列腺液,裏面可能含有精子。

所以建議致電青少年保健中心查詢,同食事後藥

請盡快致電 因為事後藥都有食嘅黃金時間,過咗避孕機會都會降低

Helloo

「破處」準確啲咁講係 陰道冠破裂,同懷孕& 嚟M ge風險係冇關係嘅,順帶一提陰道冠(處女膜)其實喺劇烈自慰/運動嘅情況下都有機會令佢破裂,因為佢既厚薄、彈性因人而異,因此唔一定關性行為事。

你會唔會係有兩個擔憂?1)不安全性行為會唔會導致懷孕?2)懷孕左嘅會唔會嚟M?

請問伴侶平時有冇用一啲荷爾蒙避孕措施(例如食避孕丸)?如果冇嘅話,聽你嘅描述似乎懷孕風險都高呀,即使冇射精都好,男性性行為嘅時候都有機會分泌尿道球腺液構成懷孕風險。

(尿道球腺液:男性喺性行為時因為性興奮而有機會分泌出透明黏稠狀嘅液體,當中都有存在精子。)

如果已經確定係不安全性行為,呢度介唔介意分享俾我哋聽你哋係幾時發生性行為嘅?因為只要未過食事後丸嘅有效時間,我哋都可以考慮服用阻止懷孕。

事後丸可以喺家計會丶母嬰健康院丶婦女健康中心丶婦科診所等等取得,俾個網址你參考下呀:) (btw疫情關係記得留意營業時間呀)

事後丸有分兩隻嘅: 一隻係屬於單一荷爾蒙(72小時之內食),另一隻係黃體激素受體劑(性交後120小時之內食)。

性交後72小時內食嗰隻事後丸屬於單一荷爾蒙系列。理論上食咗已經會開始有藥性,完美使用嘅話成效都有成97-99%(期間冇因為嘔吐副作用而將藥物排出),不過都食完事後丸有機會有唔同嘅副作用,例如係頭暈丶噁心丶疲倦丶經痛等等… 甚至影響下一次月經嘅日子同埋血量,而服用呢種事後藥之後,可以繼續服用你本身食緊嘅避孕藥,但越遲食會越影響藥效;而120小時嗰隻就唔會,不過服用呢種事後藥後,同一個月經週期就唔可以再食避孕藥啦。

不過唔係每間診所都會提供兩種類型嘅藥,可以喺預約嘅時候問吓診所會有邊種藥提供到,從而按照自己需要選擇:)

呢個係關於事後丸嘅額外資訊:

另外,關於懷孕左嘅會唔會嚟M,你會唔會都有着床性出血(俗稱「假M」嘅擔憂?)呢個其實係指受精卵着床喺子宮壁時時有機會造成少量出血。通常剩係得幾滴,又或者係一張護墊可以承載嘅血量,而且係一次性唔會連續幾日咁出現,血色同普通月經都唔一樣,一般受精去到着床講緊性行為後6-9日,而呢一個現象亦並非常見,只有少量女性會出現。如果出血嘅日子距離性行為已經超過九日,顏色同平時月經差唔多&keep住咁出血,基本上就可以排除着床性出血嘅可能性。

最後,一般受精卵著床需要6-9日,所以性行為最快7日後驗已經可以有初步結果啦,而性行為11日後驗孕,已經可以話係準確&可靠。呢度補充多少少先,驗孕主要係檢驗尿液入面嘅hCG(卵子受精着床後身體會產生嘅荷爾蒙)水平。而坊間嘅驗孕棒準確度都好高,只要跟返驗孕棒相應嘅指示操作,喺有效時間內閱讀結果- 通常喺5至10分鐘內(以說明書所述嘅時間為準)- 基本上都唔會有大問題。因此你可以選擇喺性行為後嘅第7日初步驗孕,再喺第11日confirm,如果結果係陰性嘅話就可以放心啦係冇懷孕嘅,平時如果好擔憂嘅話都可以考慮之後任何形式嘅性行為都配合返安全套有更加高嘅保障:+1:t6:

希望可以解答到你嘅疑慮啦,有咩歡迎再問:raised_hands:t6: