安立婷成功率

尋日唔小心同女朋友進行咗一次唔安全性行為
大約啱啱二十四小時到去藥房買咗安立婷食 (我知係應該去家計會)
想問下安立婷嘅成功率會唔會大減?

Hello,好欣賞你地係發生性行為後有進行補救措施,以減低懷孕風險。:blush:

首先,事後丸有分需要喺性行為後72小時或120小時內服用,而你呢款牌子嘅事後丸需要係72小時內服用,越遲食藥效會越弱。原則上你喺性行為後24小時就食咗藥,會有一定嘅緊急避孕功效。不過,由於你嗰盒嘅事後丸係藥房買,有機會藥效不佳同來源唔可靠。因為事後丸係必須經醫生處方藥物,例如你喺係家計會,或者其他私家診所得到事後丸嘅話,咁藥效同貨物來源上係可信嘅,避孕成功率亦都好高,有98% 。而且,並唔係每個人嘅身體狀況都適合透過食事後丸去作緊急避孕。因此,我地建議攞番你係藥房買左嘅包裝盒(如有),去家計會/其他私家診所,同醫生講你地嘅情況,睇睇有無需要再服用經醫生處方嘅事後丸,或者依醫生指示去進行驗孕 。

一般黎講,驗孕嘅方法係性行為後7日使用驗孕棒就會有初步嘅結果。而係11日後或者預計經期嘅日子驗孕結果會更加準確。

提醒一下:下次發生性行為嘅時候,記得整個過程戴好安全套,一方面避免懷孕風險,同時亦都可以減低性病傳播風險啊 !

(Intern 同學 Tommy)