今日同男朋友進行左性行為，其間有全程戴安全套。直至最後射完嗰下發現安全套穿咗，就即刻去左藥房買安立婷食。雖然前2日先嚟完m，但係啱啱嚟完嘅呢次因為中藥影響而推遲左6日，好擔心排卵期會按返冇遲嚟(即原本)嘅日子。想知懷孕嘅機會大唔大🥲？
Hello。
都好欣賞你哋有用到安全套嚟保護自己啊。關於安立婷，一般嚟講係性行為後72小時内食用係有避孕效果嘅，而越早服用，避孕機率越高。不過，由於你嗰盒安立婷係藥房買嘅，來源就未必100%可靠，有機會會買到冇效嘅藥物。因為事後丸係香港係必須經醫生處方藥物，假如事後丸係由醫生處方、家計會、又或者私家診所呢D途徑獲取，咁貨源就會較為可靠，唔需要擔心冇藥效嘅問題。
而月經方面，雖然月經係其中一個判斷有冇懷孕嘅方法，但嚟左月經並唔係100%代表冇懷孕㗎～。有少部份女性會係月經期間排卵，而一般情況，女性排卵日期一般都係係下次月經前14日左右。卵子由卵巢排出後係輸卵管可以生存1-2日，等待受精。男性嘅精子可以係女性生殖器官裏面維持2-3日，所以係卵子排出嘅前後幾日發生性行為都會有機會懷孕。
針對你嘅情況，安立婷嘅藥效已經係你身體發揮緊，所以都唔需要太擔心懷孕嘅問題。假如真係擔心，你可以係性行為後7日進行驗孕，睇返初步嘅結果，又或者係第11日驗多一次，從而得出更加準確嘅結果。
（Intern 同學 Alan）
1個讚