排卵遲=月經遲?

因為今次月經遲咗五日
琴日用驗孕棒結果係陰性
見到今次啲分袐物都去到預計月經既前一個禮拜先好似蛋白咁樣
會唔會因為咁樣所以月經先一齊推遲?:bowing_woman:t2::bowing_woman:t2::bowing_woman:t2:

Hello
首先講返少少驗孕資訊俾你知先 :blush:驗孕係檢驗身體有冇hCG呢種受精卵著床之後身體先會產生嘅荷爾蒙,而卵子受精著重需要大概6-9日時間。所以,係性行為7日後驗孕會有初步結果,而11日後驗孕就會有相對準確可靠嘅結果啦。如果你計算返日子,距離對上一次發生性行為已經過咗11日,而你有正確咁使用驗孕棒,咁個驗孕陰性結果就係可靠嘅。而如果你距離對上一次發生性行為唔夠11日,而你擔心嘅,咁都可以等夠日子再次進行驗孕。

排除咗懷孕嘅可能性之後,就可以耐心等月經嚟。 :relaxed:

想你知道,月經同排卵係由身體幾個繁複嘅系統互相配合而形成嘅,所以好容易受到其他身體或者環境因素影響,例如:荷爾蒙分泌、壓力、飲食、作息、藥物等等。每人每次月經嘅情況都可能會唔同嘅。你呢排有冇休息得比較少?或者情緒壓力大?呢啲都可能會令到月經比平時遲咗嚟嘅。

而分泌物狀態呢樣嘢,月經週期中荷爾蒙水平嘅變化同埋其他身體狀況都會影響分泌物嘅質地或者顏色。有啲人可能排卵期前後分泌物會變得黏稠同埋變多,不過靠分泌物嘅狀態並唔能夠好準確咁預計到排卵日期。而事實係,除非每日喺醫生指導下用排卵試紙測試,否則我哋都好難好準確咁知道究竟「排卵期」係幾時。

咁想問一下排卵遲咗係咪月經都會順延㗎?

排卵期遲咗月經都會有唔同程度嘅推遲。正常情况黎講月經週期係21-35日,平均係28日,月經週期長短都因人而異。

每個月經週期(月經第一日去到下次月經前一日為之一個月經週期),卵巢會因為荷爾蒙影響而放出一粒卵子,同時子宮內膜亦會喺荷爾蒙影響下加厚;當卵子冇受精著床,子宮內膜就會脫落,形成月經呢個現象。好多因素都會影響幾時排卵嘅日期,例如當身體分泌嘅雌激素不足,就會導致卵泡需要更加長嘅時間發育成熟,引起排卵推遲。而壓力大、飲食習慣改變、休息唔夠呢啲情況都會導致排卵比較遲。

排卵之後嘅階段,稱為黃體期,黃體期日數通常係黎月經前12-16日,平均14日左右(但係都會有啲人排卵後,短至7日/長至19日月經會出現)。而通常排卵遲咗月經都會遲黎。

(Intern同學 Coco Law)