維持勃起問題

你好,我每次勃起之後,如果冇持續用手刺激,大概十秒就會變軟。亦都試過sex轉換姿勢途中或者帶套軟左。想問吓有冇咩方法改善。

首先,陰莖嘅軟硬度受好多唔同嘅因素影響嘅,例如身體狀況、心理壓力大、環境等等,所以自慰或性行為嘅時候陰莖唔係維持着一個硬度都係正常嘅。

明白陰莖喺性行為期間變軟可能會令你造成困擾,不過亦唔使俾太大壓力自己,因為正如開頭所講心理壓力都有機會影響陰莖嘅持久度。所以,如果想提升陰莖嘅持久度,要有足夠嘅休息同埋係一個舒適、放鬆嘅環境下進行性愛,令身心都處於一個可以享受性愛嘅狀態。

自慰嘅頻率都有機會影響陰莖嘅軟硬情況。如果自慰嘅次數比較頻繁嘅話,陰莖嘅敏感度有機會減低,需要更多嘅刺激先可以達致性興奮。所以有機會係自慰過於頻繁影響陰莖嘅軟硬情況,因此可以減少自慰次數後,改善陰莖較易變軟嘅情況。

其次,亦都可以用一啲增加陰莖持久度嘅性用品,例如增加陰莖刺激嘅安全套 (例如螺紋及凸點等)、有加入可以降低陰莖敏感度嘅成份嘅潤滑劑,以及陰莖持久環。

另外,可以做凱格爾運動黎訓練陰莖嘅持久度。凱格爾運動係不斷收縮骨盤底肌嘅運動嚟嘅。首先要搵到骨盤底肌係邊度先,你可以試下去小便嘅時候嘗試中斷尿流,中斷時用力嘅位置就係骨盤底肌啦。之後記住果收緊骨盤底肌嘅感覺,然後每日練習。例如一開始可以嘗試收縮嗰組肌肉5秒,然後放鬆5秒,咁樣為之一組,重複呢組動作10次。然後身體適應咗,可以再加長加多鍛煉嘅時間同次數。呢個係個循序漸進嘅過程,唔可以要求自己嘅身體第一日就做得好好,同埋都需要持之以恆堅持練習。而當身體覺得唔舒服就要作出相應嘅調整,減少訓練嘅強度/暫停練習,以免傷害到身體。

(Intern同學 Coco Law)