同女朋友拍拖幾乎一年，性事方面好困擾。
同佢試過口交，指插，插入式，但係佢一啲感覺都冇(0 feel) 而家佢有啲驚咗性行為呢樣嘢，因為佢唔享受，我每次話想佢就驚。佢一直都0性慾，未試過高潮，唔享受性愛。
請問可以做啲咩。我幾肯定唔係我技術問題，因為同前任做係完全冇問題。同佢試過好多方法，潤滑劑，延長前戲，玩遊戲等等都係唔得。如果係要睇性治療師嘅話，請問有冇推薦？（因為家計會，明愛淨係俾已婚夫婦，私人嘅又比較貴）
Helloo
多謝你信任我哋同我哋分享呀，呢度似乎都聽到你有一份擔心同危機感喺度，不過我都好欣賞你感到困惑嘅時候仍然願意踏出舒適圈搵方法去處理呀，相信你都係重視呢份感情先會鼓起勇氣去搵resources，或者呢度我都提供多少少資訊睇吓你會唔會覺得有用呀:)
文字入面我聽到女朋友似乎對於性唔係太有興趣，無論係咩形式嘅性行為都好似冇咩感覺咁，一方面你好想令佢感覺到性帶嚟嘅愉悅所以嘗試不同方法增添情趣，另一方面同時因為伴侶持續 不太感興趣 嘅回應而感到不知所措，呢一份感覺係絕對可以理解㗎；不過呢度可能有以下情況：
1）可能女朋友本身真係對性呢樣嘢興趣不大，又或者性傾向偏向無性戀- 意思係對任何人都唔會感覺到性吸引力。
2）想問下大家平時溝通嘅方式係點樣嘅？會唔會都可以了解多少少女朋友點解對性冇咩感覺？（係本身真係咁？定還是需要再探索多啲自己身體嘅感覺？又或者受過去一啲經歷影響？- 不過呢方面都可以問得小心啲&揀個令佢感到安全舒適嘅地方問，因為可能會觸發到一啲情緒）另外，對於女朋友嚟講，會唔會都可以探討一下喺佢心目中理想嘅性愛係點樣嘅？可能了解完可以更準確地了解女朋友嘅需要呀
如果女朋友真係本身天生對性冇咩興趣嘅話，我哋一方面除咗尊重，另一方面都唔需要怪責自己呀，因為每個人嘅需要&喜好都唔同嘅。當然尊重唔代表漠視自己需求，因此呢度都好鼓勵你哋坦誠攞出嚟溝通，搵一個你哋大家都舒服嘅步伐。每對情侶都有自己獨特嘅相處模式，例如有啲人會傾好大家唔一定要有插入式性行為，有啲人會選擇先滿足對方，之後再自己解決性需要，但無論咩相處模式都需要喺大家有共識嘅前提下達成，而達成共識有樣好緊要嘅嘢就係溝通。當然如果你哋發現已經好難去溝通嘅話，都可以考慮向專業人士諮詢，但好抱歉呢度唔會推介任何機構/人俾你啦，因為輔導嚟講人夾人先係最緊要，我哋都唔想用所謂權威override左你嘅選擇，不過簡單啲講輔導主要有幾種取向：有啲會比較solution-focused/cognitive為主，過程會比較短&可能未必太深入，有啲會希望透過對話令你覺察&了解到自己嘅內在需求從而作出選擇，會深入少少但係會比較長時間，視乎你prefer邊一種取向。
另外輔導員本身自己對於嗰件事嘅睇法/取向都會好影響佢同你做輔導時定立嘅目標，為咗令到自己唔會喺過程中感到被冒犯/受傷，搵一位接納自己嘅專業人士係非常之緊要呀，不過我哋都要了解處理issue係需要時間嘅，呢度都鼓勵俾多少少時間同空間自己同埋伴侶 而費用方面坊間都有啲地方會就住你嘅經濟狀況而減免費用，不過就未必係針對於性治療- 性治療師可能係對性呢個discipline 有多啲嘅了解&受過相關training，但未必代表對sex嘅topic一律會感到接納，始終人夾人真係好重要
相信你會為自己作出最好嘅選擇:) 有咩歡迎再上嚟問啦我哋都會喺度陪住你
同佢傾過，佢而家係對性好反感。以前嘅性行為只係為咗滿足我，而強迫自己同我做。而家佢唔想再犧牲自己嚟滿足我，唔會再發生任何性行為，亦都唔想再繼續嘗試新嘅嘢（因為覺得反感）
首先都好欣賞你會同女朋友傾下關於性行爲嘅情況，亦都會關心女朋友會唔會覺得舒服同埋享受，同時都會嘗試唔同嘅方法幫女朋友提起對性嘅興趣。
睇咗你嘅經歷之後，宜家最大嘅矛盾位係你想要有插入式嘅性行爲，而女朋友唔想。同伴侶有唔一樣嘅睇法的確係會令人感到無助嘅，特別係你嘗試過用唔同方法去同對方溝通，相信你都會係某一刻感到氣餒。不過我都好好奇想知道，對你而言，「性行為」係咪只有陰莖插入陰道呢一個插入式嘅選項？而插入式性行爲對於你，或者你哋之間嚟講，喺代表住啲咩架？喺一刻嘅歡愉？喺更緊密嘅聯繫？喺一段關係嘅更進一步？喺將自己交俾對方嘅信任？呢個係一個值得思考嘅問題，因爲咁樣係關乎你點樣睇你哋之間嘅關係。
你都可以諗下第二個問題，無咗插入式性行爲，會唔會有其他辦法可以代替呢？就咁睇落，係性呢件事上面你都係比較主導果個，不如試下將主導權交俾女友，用一啲非插入式嘅性行爲，例如叫女朋友幫你打飛機，或者玩控制射精，甚至可以買啲性玩具叫女朋友幫你等等，會唔會可能都係令女朋友舒服啲嘅方式呢？
最後，呢個可能亦需要比較多時間慢慢去瞭解下，女朋友係因為咩原因而對性有反感同驚嘅感覺？會唔會以前有過啲唔愉快嘅經歷？如果有嘅，其實每次同你有性行爲都可能會諗返起一啲唔好嘅回憶或者身體感受，所以佢會覺得唔舒服，繼而令佢唔想發生性行為。不過係傾呢個問題嘅過程，都請你多多體諒下女友，因為無論相關嘅事係幾耐之前發生，亦唔係每個人都準備好去講發生過嘅事，或者未必可以好完整地講述返發生過嘅經歷。我相信你咁在乎女朋友嘅感受，都會體諒佢需要多啲時間嘅。
而即使其實冇任何事發生過，女朋友都可以對性冇興趣或者覺得反感。可能好似 @andy 咁講，女朋友係無性戀，覺得性唔係關係中必須嘅部份。咁就要諗下頭先我提出嘅問題啦：性行爲對於你或者你哋嚟講，係代表住啲咩？如果無咗性行爲，你哋嘅關係會唔會因此受到影響？如果性行為對你而言係感情關係中必須要有嘅，咁都要思考一下呢段關係係咪要繼續落去。
慢慢嚟呀，相信咁錫女友嘅你，都會俾時間女友慢慢嚟，不過都唔好忘記你自己都要時間架。放心，糖不甩嘅大家都會陪住你架。
佢係對任何性行為都感到反感，唔想，唔鍾意，包括非插入式。至於性對我哋嘅意義，對我嚟講係好重要，對佢嚟講係0，甚至係負擔。所以如果交主導權俾佢嘅話，結果應該會係0性生活。至於有咩原因我哋都唔清楚，佢係不嬲都0性慾，可能係屋企關係唔好，但係都諗唔到方法解決，而佢而家都已經唔想嘗試解決。