我同男朋友係29/4有性行為 而進行途中有個體位令到我腹部好似受咗啲壓力咁 令到我腹部痛 我就叫佢停止 然後轉其他position
我唔知係咪因為咁 自從29/4我就肚痛到宜家 有開始係右邊較痛 呢幾日情況逐漸好 但係維持肚痛 (好似想去廁所& 俾野壓住咁)
根據我嘅電話app 我係23/4嚟完m 宜家應該係排卵期? 唔知關唔關事…
請問呢個情況係因為咩事? 可唔可以自然好翻?
(ps 每次性交都有戴套, 上次嚟完m之後三次性行為都有做安全措施 應該唔會係有咗)
唔該你呀
Hello
有時性行為動作比較大／比較激烈可能都會造成肌肉酸痛嘅感覺。正如好耐冇做運動突然去健身之後肌肉會痛咁，性行為過程中可能有啲我哋平時未必會特登郁到嘅肌肉會用到，咁就會有肌肉疲累嘅感覺。再加上你有講到有體位令你覺得比較唔舒服，可能都會拉伸到，導致你而家覺得痛。 
而排卵期前後由於荷爾蒙嘅影響，都有機會出現下腹／卵巢部位有痛嘅情況。 
不過想同你解釋多少少關於排卵期嘅資訊。排卵同月經都好容易受到其他身體／環境因素影響，例如荷爾蒙水平、飲食、作息、壓力等等。而要等月經出現之後，先可以推算返幾時排咗卵。月經app嘅預計只係一個參考日期，未必係準確嘅，因為app係而你過往嘅月經週期數據去做預測，但唔會將你嘅其他身體因素考慮埋。所以，除非每日喺醫護人員嘅指示下用排卵試紙測試住，否則我哋好難準確咁知道究竟幾時排卵。
至於懷孕呢方面，如果你每次發生性行為嘅全程都有正確使用安全套，而且過程中冇穿冇漏，咁懷孕嘅風險係好低嘅。 
同埋仲有其他因素有機會導致肚痛嘅，例如腸胃方面問題／壓力等等。
建議你觀察下先，睇下情況有冇好轉。如果幾日之後情況持續甚至更加嚴重，咁都建議盡快去睇下醫生，檢查下身體呀！ 
其實呢幾日個情況好似好咗少少
我唔肯定嗰種痛係咪肌肉痛
如果再形容多少少 就好似胃脹氣咁 同埋嚟m前嘅痛 再加右下腹有少少痛
我比較擔心會唔會有黃體破裂嘅情況 不過我冇出血嘅 同埋會唔有可能陰道有啲受損嘅情況出現？
同埋嗰時令我痛嘅體位係我躺平面向男朋友 將腿放係佢膊頭到 即係肚係摺埋咗 我諗緊係咪咁樣令到腹部係性行為中受壓而導致到呢個情況出現
想知係咪關事, thank you
的確有時性行為比較劇烈，對於陰道／子宮頸造成嘅撞擊比較大嘅時候，有機會出現輕微腹痛嘅情況。正如有啲人做完子宮頸抹片測試之後嘅1－3日可能個肚都會有輕微嘅不適。
你所講嘅體位可能因為壓逼到腹部或者拉伸到腹部肌肉，所以導致痛嘅情況出現。而其他有機會出現嘅原因我哋之前都有幫你列舉。
單憑文字我哋暫時都未能夠好肯定到究竟導致你腹痛嘅確實原因係咩。所以都係建議你留意住自己嘅身體情況，如果痛嘅感覺冇好轉，係持續甚至加強咗嘅，咁都建議盡快去搵醫生檢查下，令到自己安心啲呀。