好擔心自己懷孕

hello 我4月6號至4月13 14號嚟M 然後4月15號同男朋友有性行為 有戴套而且都係攞出嚟先射 但係都好擔心 呢半個月一直都有驗孕 但係都係一條線 而我自己嘅經期一直都係唔準 然後都有食中藥調理 但係最近我個肚好奇怪 肚臍下接近三角位有少少凸起 但係禁落去係軟嘅亦都冇任何唔舒服 乳房有啲漲 我唔肯定自己係谷禁M定係有bb 啲症狀有啲同懷孕有相似 一直都擔心 覺得自己就嚟有焦慮症

Hello
如果你發生性行為嘅全程都有正確使用安全套,而過程中安全套冇穿冇漏,咁懷孕風險係好低嘅。

驗孕係檢測身體中有冇hCG呢種只有受精卵著床之後身體先會產生嘅荷爾蒙,而論之受精著床需要6-9日時間。所以,最後一次性行為(4月15號)7日後(4月22號)驗孕會有初步結果,而11日後(4月26號)驗孕就會有相對準確嘅結果。如果你驗孕嘅日期距離性行為已經超過11日,而且你有正確咁使用驗孕棒,咁個陰性結果就係可靠嘅。如果你依然好擔心嘅,你可以考慮進行多一次驗孕,然後設定一個目標俾自己,如果呢一次都係陰性,就要嘗試相信呢個結果,同自己講「我冇懷孕」。 :blush:

月經同排卵係由身體幾個系統互相配合而形成,所以好容易受到其他因素影響,例如荷爾蒙水平、飲食、作息、壓力、生病、藥物等等。每人每次嘅月經情況(包括月經週期長度、流血日數、流血量、經痛程度、經前不適症狀等等)都可能有所不同,即使平時嘅月經都好穩定,都唔代表下次一定會冇任何變化。而你都有講自己經期比較唔穩定,有食中藥調理。

腹部脹、胸部脹呢啲都唔可以作為判斷有冇懷孕嘅指標。而事實上,除咗進行驗孕之外,冇任何一種症狀可以用嚟好準確咁判斷自己有冇懷孕。胸部脹可能係因為月經週期荷爾蒙變化導致。而下腹脹可能係因為排卵後子宮內膜喺荷爾蒙影響下加厚,甚至消化系統問題都會導致下腹漲起。呢啲症狀通常會隨著月經出現而消退。 :relaxed:

明白你對意外懷孕嘅擔憂。想你知道如果每次發生性行為嘅時候,都有全程正確咁使用安全套,其實避孕成功率係好高嘅(大約98%)。關於安全套嘅正確使用方法,可以參考:Login • Instagram
或者你都可以考慮使用其他避孕措施,例如荷爾蒙避孕法(正確使用情況下避孕成功率有99%),包括避孕針同避孕藥。避孕針要由醫生檢查你身體狀況之後覺得適宜使用先注射。而避孕藥雖然相對容易買到,但我哋都建議第一次服用之前去睇下醫生,諮詢下意見,睇下你嘅身體係咪適合、適合邊一款避孕藥。而且你有提及經期唔穩定嘅問題,服用避孕藥同時都會有穩定經期、減少經前同經期不適嘅效果。如果有需要嘅話,可以去家計會診所/母嬰健康院/部分私家診所預約見醫生。 :woman_health_worker:t2: :man_health_worker:t2:
同埋想你知道,避孕針同避孕藥並唔能夠好似安全套咁,有減低性病傳播同其他感染(例如尿道炎、念珠菌感染、龜頭炎、陰道炎等)嘅風險。你都可以考慮使用荷爾蒙避孕法嘅同時配合埋安全套一齊使用。

現時除咗完全唔發生性行為之外,並冇任何一種安全措施可以做到100%避孕。如果你真係好擔心,暫時心理上未準備好,都不妨同男朋友商量下,話俾佢知你嘅擔憂。喺你準備好發生陰道陰莖插入式性行為之前嘅呢段時間,可以考慮唔發生任何性接觸,或者一啲低懷孕風險嘅接觸,例如口交/手交。但你準備好,先發生進一步嘅性行為, :wink:

好啊 唔該你 希望自己可以快啲嚟M啦 咁就少咗份擔心:sob:

唔該 我想問係咩情況下驗孕棒係唔準㗎 同埋有人係天生hcg比較低 所以驗唔到㗎

hello :blush:
見你開咗另一個post問緊呢個問題,我哋喺嗰邊已經回覆咗,可以睇返: 驗孕棒唔準 - #2 Ching_StickyRiceLove