會不會懷孕嗎?

就是我女朋友4月26號月經完,然後5/2今天我們發生了一次(全程沒有戴)就是射的時候在邊邊射了一點點然後等了一兩秒全拔了就全射了,那這樣會不會懷孕

你哋今次嘅性行為係有懷孕風險嘅。

陰莖受到刺激嘅時候會分泌透明嘅尿道球腺液,當中有機會含有少量精子。月經同排卵係由身體幾個系統互相配合而形成,好容易受到其他因素影響,就算女朋友4月26月經完,如果佢今個月經週期比較短,可能已經排卵。所以,無論月經週期嘅邊一日,只要陰莖同陰道/陰道口有接觸,就會有一定嘅風險。亦唔建議使用「安全期」或者體外射精作為安全可靠嘅避孕措施。 :x:

如果你哋擔心懷孕嘅話,你哋可以考慮進行緊急避孕。喺性行為嘅72小時內/120小時內可以服用緊急避孕藥(事後藥),因為係處方藥物,所以要睇咗醫生,醫生認為女朋友嘅身體適合使用先會俾藥。而如果女朋友嘅身體並唔適合食緊急避孕藥,喺性行為120小時內,都可以由醫生置入子宮環作為緊急避孕嘅方法。如果你哋想進行緊急避孕,就盡快去家計會診所/母嬰健康院/部分私家診所預約睇醫生啦。 :woman_health_worker:t2: :man_health_worker:t2:

如果你哋衡量完覺得係唔需要進行緊急避孕,而你哋又擔心嘅,都可以考慮驗孕。驗孕係檢測身體中有冇hCG呢種只有受精卵著床之後身體先會產生嘅荷爾蒙,而論之受精著床需要6-9日時間。所以,最後一次性行為(5月2號)7日後(5月9號)驗孕會有初步結果,而11日後(5月13號)驗孕就會有相對準確嘅結果。

最後想提返你哋,每次發生性行為嘅時候,記得全程正確咁使用安全套,咁就可以更加安心啊!關於安全套嘅正確使用方法,可以參考:Login • Instagram
或者你哋都可以考慮使用其他避孕措施,例如荷爾蒙避孕法,包括避孕針同避孕藥。避孕針要由醫生檢查女朋友身體狀況之後覺得適宜使用先注射。而避孕藥雖然相對容易買到,但我哋都建議第一次服用之前去睇下醫生,諮詢下意見,睇下女朋友嘅身體係咪適合、適合邊一款避孕藥。如果有需要嘅話,可以去家計會診所/母嬰健康院/部分私家診所預約見醫生。 :woman_health_worker:t2: :man_health_worker:t2:
同埋想你知道,避孕針同避孕藥並唔能夠好似安全套咁,有減低性病傳播同其他感染(例如尿道炎、念珠菌感染、龜頭炎、陰道炎等)嘅風險。你都哋可以考慮使用荷爾蒙避孕法嘅同時配合埋安全套一齊使用。 :blush:

中嘅機會係咪好大?

雖然相比起體內射精,風險相對冇咁高。但造成懷孕嘅只係需要一粒精子。而且我哋懷孕風險並唔可以簡單咁計算到一個數字出嚟。

所以你可以同伴侶商量下,衡量下風險,睇下需唔需要進行緊急避孕。 :blush: