我4月頭嘅時候有服用過緊急避孕藥
四月中嘅時候有嚟M
之後4月20號嗰陣時有個性行為
啱啱有嘔同埋子宮出血亦都有腹痛嘅症狀
上網check過話係流產或者係子宮有問題
請問呢個現象係咪子宮有問題
睇返你講有嘔同埋子宮出血腹痛嘅情況，建議你可以先驗孕。因為驗孕係檢驗尿液中嘅hCG水平，hCG係卵子受精著床之後身體會產生嘅一種荷爾蒙，而卵子受精著床需要大概6－9日嘅時間。所以，喺性行為7日後驗孕會得到初步結果，而11日之後就會得到相對比較準確嘅結果。
如果驗孕棒結果係陰性嘅話（即是冇懷孕），就可以排除著床性出血嘅可能性。當受精卵著床系子宮壁嘅時候，有機會會造成出血嘅狀況。原因可以係因為受精卵與子宮壁碰撞時造成出血情況；或因為荷爾蒙問題造成出血情況。一般著床性出血嘅血量較少，顏色較淺，可能會少至只有一滴血，部分人可能血量會多少少。通常只會一日內一瞬間流完，並唔會似月經咁持續黎4-5日。著床性出血時亦唔會好似黎月經咁身體有劇烈感覺，例如肚痛、頭暈等。
另一個可能性就係排卵期出血，有時因為荷爾蒙變化嘅影響，排卵期期間會出現出血嘅情況。再加上你係4月頭有食過事後藥，有機會影響1~2次月經週期嘅狀況。
提醒返你呢幾日要留意出血同腹痛嘅情況。流產通常會通常會伴隨比較明顯嘅下腹／下腰／下背痛，而分泌物嘅顏色會相對比較鮮紅色。你可以留意下自己嘅身體狀況。如果有持續甚至加劇，咁就要盡快睇醫生檢查，聽醫生解釋返情況，再按醫囑按時服藥。
而如果出血同埋腹痛嘅狀況消退咗，嚟緊都可以留意下自己仲有冇非經期出血嘅情況，如果連續幾個月經週期都有出血，都值得搵醫生檢查下，睇下有冇啲子宮／卵巢／荷爾蒙／陰道問題導致出血。
（Intern同學 Coco Law）
感謝你咁詳細既解答 今日都有流血同埋如果好不幸地真係流產請問驗孕驗驗到係懷孕
1個讚
唔好意思啊咁遲先覆到你唔知你最後出血嘅情況有無持續
就翻岀血嘅情況而言，好似同事最尾同你講解咁，最好及早搵醫生做檢查
如果有非經期性嘅持續岀血，而又伴隨著下腹痛，係有可能係子宮或子宮頸岀現問題。睇番你發生性行為嘅日子係4月20日，發問時係5月3日，如果係已經懷孕的話，其實呢個時候受精卵只係著床咗一段短時間，啱啱開始慢慢發育成胚胎，假如係呢個時候流產的話其實血量唔會太多，亦較少會出現持續而且劇烈嘅腹痛。所以你所見到出血嘅情況會係由流產導致嘅可能性都相對較低。
另外，流產之後會唔會驗到懷孕，係會嘅。好似同事喺上面咁講，懷孕嗰陣時會分泌人絨毛膜促性腺激素（HCG）當你出現流產情況，呢一種激素會逗留體內一段時間，唔會因為流產就馬上消失。佢會大約一個月之後先會消失。所以，如果你係早期流產，驗孕嗰陣時，有機會驗到你係有懷孕。
如果有出血，有唔尋常嘅痛，真係最好去睇醫生，知道自己身體到底發生咩事，去降低患病同併發症嘅風險
希望可以解答到你嘅問題啦
（Intern同學 Dorothy Cheung ）