Hello! 想請教一下行房時只是無套插入兩下，沒有內射的，就是那兩下足以令擔心懷孕，每晚失眠。
上個月是3月22日第一天來月經，在3月28日只行房一次，分別在4月14日（行房後17天）和4月21日（行房後24天）去了化驗所驗HCG都是negative, 剛巧4月21日同一天有月經，但是只來了三天，月經顏色是鮮紅色、有血塊、最多血量那天都可以佔到三塊夜用m巾，她好擔心是懷孕出血或者著床出血，因為一直以來她的月經都是遲來數天和血量都是維持大約五天，所以之後在4月23日（行房後26天）和4月24日（行房後27天）早上自行驗尿都是negative。近來，有疑似懷孕徵狀如作嘔作悶、頭暈、腰酸背痛、胃酸倒流等，於是行房後30天再抽血驗孕結果是陰性，在行房後36天再自行驗尿都是陰性的。
請問這個case，她還需要繼續擔心自己是懷孕，還需不需要抽血驗孕HCG?4月21日是著床出血還是月經嗎？
請為我解答，謝謝你
你好呀 @Ms.Lee 
唔洗擔心，係無懷孕嘅。
首先因爲你哋已經多次進行驗孕，而其中去診所抽血驗孕已經係比較準確嘅方法嚟。而且你哋係喺性行爲30日後有再驗孕，喺呢個日子進行檢查，如果有懷孕，hCG嘅濃度已經非常之高，無論驗血定驗尿都會驗得出。而當時嘅結果係顯示冇懷孕，所以基本上已經可以排除懷孕嘅可能性。
至於4月21日果次嘅出血，係月經嚟嘅。因爲著床性出血一般都係喺着床期間出現，着床大概係性行為發生6至9日內會發生。而血量方面，着床出血通常都係點狀出血、紅棕色，唔會有血塊，亦唔會持續數天。4月21日距離你哋係3月28同4月14發生嘅性行為已經超過咗9日，而且當時嘅血量係持續，亦需要用到三塊夜用m巾，所以可以排除係着床出血嘅可能。而月經本身其實都會被好多原因影響，例如生活作息有改變、飲食習慣有改變、病過、食過藥、情緒有大起伏等等都會導致變化。而大部份「懷孕初期」嘅症狀，例如你所講嘅作嘔作悶、頭暈、腰酸背痛、胃酸倒流等，其實都可以由唔同外在或內在原因引起。變相我哋唔能夠單憑呢啲症狀有冇出現去判斷一個人係咪已經懷孕。而家上你哋已經多次用科學嘅方式驗孕，結果都係冇懷孕，如果呢啲症狀有持續出現或者有加劇嘅跡象，都建議你哋盡快去睇醫生做詳細檢查。
因爲你哋已經用咗準確驗孕方式得出無懷孕嘅結果，而對方亦已經係4月21日嚟咗月經，代表3月28日同4月14日嘅性行為冇導致懷孕。而喺4月21日發生嘅性行為，因為當日係月經嘅第一日，會因此而導致懷孕嘅機率亦係非常之微。明白如果你哋現時冇懷孕打算，面對可能意外懷孕嘅機率真係會感到好擔心，因此你做咗好多嘢去檢查有無懷孕，但係你都要思考下，你會相信邊一個結果，係驗血？驗尿？定係過咗3個月個肚都無大先會安心。又或者係要做幾多次檢查你哋先會相信同接受自己係冇懷孕。否則，不停反覆地去做檢查，但又唔相信結果，其實都會進一步加深你哋嘅憂慮。
最後，雖然你哋冇喺體內射精，但只要性器官之間有直接接觸過，就會有導致懷孕嘅風險。如果你哋現時未有懷孕嘅打算，日後發生性行為嘅時候都要選擇返適合雙方嘅安全措施。既然最近呢幾次性行為嘅經歷都令你地感到非常擔憂，咁日後更加要選擇好適合嘅安全措施，令性行為係安全同安心嘅情況下發生。 
知道，十分謝謝你