我上個月5號黎M, 4月份因為同男朋友開始同居大家都有少少興奮係危險莆同安全期都有做
應該有5-6次
我地做個陣每次都好乖有帶套同帶住套外射
頭幾前有check個套有冇穿, 但係唔識只係check左個頭有冇精流出黎就算
後面幾次都有裝水check都冇穿到
但係有1-2次因為男朋友一帶套就軟左, 佢隔住個套整番硬先再入, 事後先諗好似有D危險, 咁大既摩擦力會唔會令個套有問題
同埋本身我每個月黎M前既症狀都幾勁, 個胸會好痛同個肚會好唔舒服, 但係今個月除左個胸既邊位有少少痛之外就無任何唔舒服, 唔似想黎M咁
怕會唔會我地用套不當就BINGO中左, 因為未有計劃生仔, 雖然同男朋友都就黎結婚,但真係唔吁大住肚去結
你好呀 @stablely 
如果你哋一直都有用安全套嘅話，其實懷孕嘅風險唔大架，唔洗擔心。
不過你所講，戴咗安全套發現軟咗再整返硬嘅情況的確係有可能令安全套有破裂嘅風險嘅，因爲係過程當中有可能手指甲會刮到，因此導致破裂，不過見你話之後都有裝水入去檢查有無穿到，其實都唔洗，如果無穿到都唔洗擔心嘅。如果真係好擔心嘅話，可以係性行爲後7日驗孕得到初步結果，11日後驗嘅結果就會更加準確。
可能坊間會話用安全期避孕，但係使用安全期避孕並唔係一個有效的方法，因為月經週期可以被好多因素影響，例如呀生活習慣嘅改變、情緒變化、有無食緊藥物同病緊等等，變相亦較難準確推算出一個絕對「安全」或者「危險」的日期。而且一般來講都要等月經嚟咗先可以計算返上個月嘅周期，同埋估算排卵嘅日子。所以，其實唔可以喺未嚟月經就推算幾時係安全或者危險嘅日子。
至於每個月月經前嘅症狀會唔會有唔同，其實大部份呢啲症狀都係由荷爾蒙水平變動而導致，所以每個月都有機會出現變化。有機會係出現唔同症狀，有機會係症狀出現嘅程度不一樣，亦唔係每一個人每個月都會出現同樣嘅症狀。前面提及可以影響月經周期嘅因素亦係會影響月經前後症狀嘅。所以即使今個月你經歷到嘅症狀同以往有唔同，都唔需要太擔心。