性病風險問題

上月叫了性服務,只做了有套手淫,除套後她用濕紙巾幫我抹乾淨,期間她有直接用手碰到我的包皮,然後回去後發現抹得不太乾淨,內褲上有類似自己的精液和濕紙巾的水,而我的陰毛位置有一粒暗瘡
這樣她用手和濕紙巾碰我的陰莖和內褲的液體碰到那顆暗瘡,會不會有風險?

補充那顆暗瘡當時不知是否有破,只是回家後看沒有明顯破口,但有少少液體流出和按下會痛

都想知道當時對方手上面有無明顯嘅傷口架?如果無嘅話,暫時嚟講都唔需要太擔心嘅,因爲性病主要係透過高風險體液,例如精液、尿道球腺液、陰道分泌物、腸液同血液,直接接觸到性器官、比較脆弱嘅黏膜組織(例如口腔、肛門、陰道、尿道口),特別係當上面有開放性傷口(正在流血)先會有比較大機會可以造成傳播,而且亦必須要其中一方係感染者先有機會造成傳播。性工作者亦唔代表必定係有感染性病。而且手淫期間你哋有用安全套,如果對方嘅手無傷口嘅話,其實都唔會有高風險體液嘅接觸,會導致性病傳播嘅風險亦非常微。

如果你真係好擔心嘅話,可以去衛生署嘅社會衛生科做免費嘅性病檢查,或者去私家診所/化驗所進行測試。一般會建議喺性行為3個月後(HIV病毒嘅測試空窗期,亦係常見性病之中最長嘅空窗期)先進行全面檢查。因為即使你現時去做的話,都只會得到一個初步結果,需要三個月後再進行檢查去確認。而如果你選擇去私家診所,大部份會有提供空窗期較短嘅測試方案,可以更早知道自己有冇受感染,但價錢就會比較貴,可以視乎自己嘅需要選擇。