你好 好擔心所以想請教一下幾條問題
- 男朋友今日用佢龜頭直接磨我陰部/頂我陰部（但無插入去，亦都無射）feel到佢有precum然後我又咁啱排卵期下面好濕。事後我驚所以直接用消毒濕紙巾抹陰部，想請問有無懷孕風險？
- 唔小心用手指掂到男朋友啲precum，過左幾分鐘之後又掂自己陰道口/陰唇位置（排卵期下面好濕）發現左之後我又直接用消毒濕紙巾抹陰部，想請問有無懷孕風險？
另外想講既係發生呢兩件事之間男朋友今朝其實已經打過飛機射過，所以佢話precum入面既精子少之又少但因為排卵期所以好驚
Hi,你懷孕嘅風險相對較低，唔需太過擔心。
陰莖性興奮時通常會流出透明黏稠液體(尿道球腺液 Cowper’s fluid/pre-cum),當中其實係有機會含有少量精子。雖然比直接在陰道內射精的數量少很多,但仍然有機會導致懷孕。所以手掂過陰莖然後插入陰道/ 陰莖摩擦陰道，當中嘅尿道球腺液係有機會導致懷孕。而你所講嘅事後用消毒濕紙巾抹陰部，其實都唔建議用消毒濕紙巾去清潔，因為有酒精成份嘅產品刺激度較高，都唔適合用嚟清潔比較敏感嘅陰部，建議可以用普通清水清潔。
不過都可以放心，因爲精子嘅存活率係受溫度、濕度、物料、酸鹼度等影響，即暴露係空氣期間可能已經死亡，同埋精子遇到水都會死亡。所以如果唔係摸完就立即插入，其實當中懷孕嘅風險都相對低嘅。
如果擔心懷孕，可以選擇以下嘅緊急避孕措施:
1.服食經醫生處方嘅事後丸就能有效緊急避孕，但事後丸有分需要喺性行為後72小時或120小時內服用，越早服用藥效越佳。
2.如果距離上次性行為已經超過左120小時，你亦可以選擇使用驗孕棒進行驗孕，可以喺性行為發生7日後透過驗孕棒驗孕去得到初步嘅結果，而係11日後就會更加準確。
另外，都想講下月經周期，靠自己估算嘅排卵期/安全期，其實避孕嘅成效未必顯著，因爲每個人係受各種因素影響月經，例如壓力和睡眠不足等，都會出現月經提早或延遲嘅情況，又或者係月經期間亦有機會出現排卵嘅情況，所以計算一個長期嘅月經週期未必一定準確。除非每日都係醫生指引下用排卵棒測試體內狀況，否則無辦法準確知道係邊一日排卵。所以計算安全期並唔可以可靠地避孕。因此，冇論係月經週期裡面嘅任何時段，例如係安全期，排卵期，甚至黎左月經，只要進行不安全嘅性行為（不戴套進行插入式行為，又或者分泌物有接觸到雙方嘅性器官)，都會有懷孕風險，所以建議下次進行性行為時戴上安全套保護雙方安全及預防性病發生。
（Intern 同學 Tommy)
你好 想問吓 同男朋友體外磨擦 佢同我都有啲濕 冇插過入去 會唔會懷孕？
上次嚟m係 7/10，計過好似係排卵期🥲
我係咪應該去食事後丸？但好擔心會影響之後經期
Hello
多謝你嘅提問～好似上面嗰位同事所講，只要性器官有直接接觸，而且唔使用安全措施，就有意外懷孕嘅機會。但見到你有話冇進行插入式嘅性行為，所以意外懷孕機會較低。
至於排卵期方面，因為月經周期都受到好多因素影響，所以並唔係每個月嘅排卵期都會係同一日，所以咁樣嘅猜測其實未必會準確。至於事後丸方面，因為事後丸係需要喺有限時間內服食(五日內)，請問你同男朋友係幾時發生性行為？如果係五日之內，可以去家計會或者醫院，喺醫生姑娘檢查身體後服食，由於係香港事後丸係屬於經醫生處方藥物，所以都唔建議喺家計會或者醫院以外嘅其他地方購買。如果已經超過五日，又好擔心嘅話可以先進行驗孕，喺性行為後7日進行驗孕就會有初步嘅結果， 11日之後就會有準確嘅結果。
希望解答到你嘅問題
1個讚
我係23/10 AM呀。。。我擔心事後丸會好傷身
但咁樣 我有冇需要食事後丸？
Hello
喺時間上，如果你真係打算食嘅話，你聽日去家計會或者醫院睇醫生，都係趕得切食事後丸嘅。
其實根據你所講嘅情況，好似上面同事咁講，你冇插入式性行為，意外懷孕機會係比較低。但我地都好難完全確保到你會唔會懷孕。因為只要冇使用到安全措施，然後又有直接接觸，就已經係會有懷孕嘅機會，我哋都好難100%完全排除得到所有嘅懷孕機會。如果你真係好擔心嘅話，都可以去家計會或者醫院，搵醫生講返相關情況，醫生檢查完身體，就開處方適合嘅事後丸俾你服食。
另外，事後丸其實係高劑量嘅荷爾蒙藥物。的確，食事後丸係會對身體帶來一定嘅副作用，例如某啲人可能會出現嘔心或者不適等副作用，但通常會喺1-2日之內消散。而且都有機會會影響1-2次嘅經期，但通常1-2次經期之後就會回復正常。呢個就可能要睇吓你自己衡量你係咪選擇服用。只要唔係食得太頻密，例如連續兩個月經周期都食，或者同一個月經周期之內食多過一次，其實副作用都不至於好大。
最後都提醒，其實如果冇生育計劃嘅話，即使唔係插入式性行為，只要性器官有直接接觸，想避免性器官分泌物有意外接觸，都可以用返安全套先進行性行為，咁下次就唔使咁擔心會唔會懷孕啦。你都可以留意番我哋呢個簡短嘅post，係講點樣正確使用安全套：https://www.instagram.com/p/B4EX0FVFLUf/?igshid=NzNkNDdiOGI%3D
1個讚
唔好意思想問吓事後丸會唔會影響月經流量？
我食完事後丸之後 經期遲咗嚟 痛多咗 但月經流量去到第4日左右就得少少 🥲咁會唔會有咩問題
同埋除咗事後藥外，本身月經都好容易受唔同身體情況影響，例如飲食、作息、運動、壓力等等。每人每次月經週期嘅情況，例如週期長度、流血日數、經血量、經痛程度等等都可能唔同。如果你連續幾個月經週期都有好明顯嘅變化而你擔心嘅，都可以考慮搵醫生檢查下身體呀。