一直未黎m

上一次黎m係3月25-3月30號,對上都係平均35日黎一次,但最耐果陣都試過一個半月先黎,我同男朋友既性行為係體外射,冇戴套冇食藥,係5月5號朝早用晨尿用驗孕棒check係一條線,但到依家都係未黎m,以往就快黎m前一星期個胸就會好漲,谷m方法係同男朋友做完第二日就一定會黎,我5月4同5月6夜晚都有同男朋友做,都係外射,但依家完全冇黎m既徵兆,因為最近都情緒好差又夜瞓,又擔心會唔會有左所以緊張到影響遲黎m,想問下到底係已經有左定係點?:pray:

Hello~多謝你嘅提問。首先,你話平均35日嚟一次月經,距離上次到而家為止都係39日左右,只係延遲咗四日,屬於正常嘅範圍,加上你有講過最耐嗰陣都試過一個半月先黎m,所以唔需要太擔心。月經遲嚟嘅原因有好多,而壓力係其中一樣,所以你最近情緒唔好,同埋夜瞓都有機會導致遲黎m。因為人大腦嘅下視丘係負責調節身體激素嘅,且好容易受到情緒壓力影響。而壓力太大會令下視丘功能異常,選擇關閉相對於生存而言,較為非必要的生育功能。所以有啲人一遇上壓力事件,經期就會遲遲都未嚟。而咁樣都不失為一個警號,表示身體已經冇辦法負擔呢啲壓力,要俾自己好好休息。

同埋,都想提返你體外射精都有一定嘅懷孕風險。根據統計,使用體外射精避孕嘅伴侶,喺一年內懷孕嘅機率高達18~28%,最主要的原因係錯誤判斷離開陰道嘅時機,因為要完美判斷係有相當嘅難度嘅。 另外,射精前嘅分泌物,包括前列腺液等,都含有少量的精子,呢啲分泌物在受到性刺激嘅時候就會分泌,所以即使未射精,只要冇做足安全措施,精子都係有可能進入子宮,導致懷孕。

另外,暫時冇任何研究顯示性交有助「谷m」,所以你話之前同男朋友做完第二日就一定嚟可能只係巧合。如果你懷疑自己係咪有咗,你可以喺性行為7日後(13/5)或者11日後17/5)進行驗孕,因為驗孕係檢測身體中有冇hCG呢種只有受精卵著床之後身體先會產生嘅荷爾蒙,而論之受精著床需要6-9日時間。所以,最後一次性行為7日後驗孕會有初步結果,而11日後驗孕就會有相對準確嘅結果。

你好呀, 我係5月9號黎m,尼一日開始左食避孕藥,5月14到16尼幾日都流啡,想問下係咪月經排得唔乾淨又或者係食避孕藥既副作用?同埋我係咪可以確認自己冇懷孕啦,感謝:pray:

Hello
如果你5月9號月經已經出現,咁5月9號或之前嘅性行為就係冇導致懷孕嘅。如果你好擔心嘅,你可以進行驗孕,可能你親眼見到驗孕結果,都會安心啲。 :blush:關於驗孕嘅資訊,可以睇返:

至於避孕藥呢樣嘢,都想問下你,你食藥之前有冇睇下醫生先? :face_with_monocle:
雖然避孕藥好容易喺市面買到,但每款嘅人造荷爾蒙成份同劑量都會唔同,而且唔係每人嘅體質都適合食,例如有肝臟/腎臟/心臟/免疫功能或者血壓問題嘅人就未必可以食。所以建議食藥之前要搵醫生檢查下你嘅身體係咪適合、同埋適合食邊款藥。如果你食藥之前冇睇過醫生,而你擔心嘅,你可以考慮去家計會診所/母嬰健康院/部分私家診所預約見醫生。 :woman_health_worker:t2: :man_health_worker:t2:

「5月14到16尼幾日都流啡」呢樣嘢,首先要睇返你本身月經經期係幾多日。
而且服藥初期因為身體適應緊人造荷爾蒙,都會有流啡呢個副作用。通常1-3個月身體會慢慢適應,副作用會消退;不過有啲人可能需要更加長時間適應,甚至要轉藥先搵到最適合自己身體嘅一款。如果流啡情況持續時間長甚至嚴重咗嘅話,都建議搵醫護人員檢查返。 :relaxed:

我食緊yaz係萬寧買既,冇睇醫生就開始食,如果想去家計會既話要點樣約同埋係咪要比錢架

如果你係26歲以上,你可以喺診症時間之內去就近嘅家計會節育指導診所(https://www.famplan.org.hk/zh/our-services/clinic-services/birth-control/content )見醫生就可以啦,但係由於疫情嘅關係,建議你都係打去家計會問吓佢哋嘅情況,以免太多人而導致你白行一趟。

如果你係26歲以下,就需要使用家計會嘅青少年保健服務(https://www.famplan.org.hk/zh/our-services/clinic-services/youth-health-care/content)你可以直接打去想去個青少年保健中心度預約,或是喺家計會嘅網站揀返【e-服務預約|青少年保健服務】進行預約。如果係用e-服務預約的話,職員會係辦公時間內打電話俾你了解多啲你嘅情況同埋確認。

預約時可以同職員講你係本身有食開避孕藥,但食之前冇徵詢過醫生意見,所以想預約見醫生。

去到預約當日,提供身份證登記後你需要填寫一份表格,主要都係有關個人資料同埋病歷。之後就會入房見護士,同你度高磅重,了解返你月經嘅情況,例如經血量、月經嚟嘅時間同維持幾耐、幾歲開始有性行為、同埋以往所用嘅安全措施等等。之後就會見醫生,評估你嘅身體情況適唔適合食藥。醫生亦會同你解釋一下藥物嘅原理,同埋推薦適合你嘅牌子(如果你有自己想嘗試嘅牌子,到時都可以主動同醫護人員提出),最後都會同你講解下食避孕藥嘅注意事項同可能出現嘅副作用等等。視乎你嘅身體情況,醫生嘅決定你可以配幾多份量嘅藥物,你會睇吓有冇需要係一個月後返去覆診。當然,如果食藥途中出現咗任何問題,都可以隨時打電話同佢哋約時間檢查。:blush:

咁之後就係俾診症費同藥錢(係網站入面都有列出大概收費),第一次去大概係$280 (醫生評估$150 + 護士評估$30 + 藥物$50-100),你打去預約嘅時候都可以再問一問職員。因為實際收費都會視乎你嘅身體狀況而有不同,例如需唔需要見醫生,定淨係見護士就可以或者需唔需要做額外檢查等等。所以第一次上去最好帶定多少少錢。如果成功開藥,之後主要想去配藥的話,就只需要俾藥物嘅費用。家計會嘅藥物係賣得比坊間平,而且有咩事亦可以隨時返去覆診,確保安全。交完錢拎埋藥物之後就可以離開診所啦。

1個讚