應該點算好呢?

你好,上次嚟m係11/3,4月頭中個陣有少少啡色分泌物,最後一次sex係30/4,每次sex都有帶套,但30/4個次中途個套縮左上去,淨係包實左個頭,之後都有帶返好先繼續,最尾射都係帶住套係出面。
3/5有驗1次,係negative。諗住11號再驗,會準啲。
但如果驗完無事,12號都未嚟,因為到12號為止已經係以往最耐嘅週期日數,齋等定可以去睇醫生?有冇得食避孕藥嚟令到嚟m?因為本身有卵巢多囊症,諗住等下次嚟m就食避孕藥調經。

Hello~多謝你嘅提問。首先,好欣賞你喺做愛嘅時候有做足安全措施,使用安全套。而四月頭中嘅啡色分泌物可能係因為排卵期,荷爾蒙水平變化,或者其他嘅心理狀況所導致,除非出現臭味或者灼痛、痕癢嘅感覺,基本上都係唔需要理會嘅,只需要更加頻密咁清潔下體,同埋更換護墊就ok。

而你30/4嗰次做愛嘅情況的確係會增加懷孕風險,但係原則上嚟講風險並唔大。因為陰莖喺射精之前會分泌出尿道球腺液,內含少量精子,如果喺安全套縮咗上去嘅時候,流到安全套包覆唔到嘅地方,並接觸到陰道,咁就係有較低嘅機會懷孕。不過由於可能性唔高,所以亦都唔需要太擔心。另外都想提提你,雖然驗孕棒最快嘅檢驗時間喺做愛後嘅7日,但喺11日後或預計月經嘅日子驗就會更準確。所以你3/5檢驗嘅結果就未必最準確,最好喺11/5當日再驗一次去確認個結果。

至於月經延遲嘅原因有好多,體重過輕,壓力大,生活唔規律…都會導致月經遲嚟。所以如果你12號都未嚟月經嘅話,建議繼續等,觀察下先。通常月經比起平時遲咗較長嘅時間,例如三個星期以上都未嚟,醫生先會考慮處方荷爾蒙藥物去催經,而實際會唔會開藥都視乎每個人本身嘅身體狀況。你本身有卵巢多囊症,如果有睇開嘅婦科醫生,都可以去諮詢下。根據你嘅身體情況,唔排除醫生會早啲開藥俾你。暫時嚟講,你可以先等11號進行驗孕,再考慮會唔會去家計會做詳細嘅婦科檢查,或者搵可信賴嘅婦科醫生作診斷,但千祈唔好亂食藥。

而卵巢多囊症雖然唔可夠完全根治,但係可以透過口服避孕藥減輕症狀,令身體嘅激素回復平衡,不過藥物都有好多種,唔係每個人都適合食藥,最好都係預約返醫生做檢查,根據你嘅身體狀況,判斷你適唔適合食藥,或者邊種藥適合你,同埋幾時開始食比較好。

1個讚

我今日朝早第一個小便驗左,得一條線。但都仲未嚟m

如果係一條線嘅話,就代表無懷孕嘅,所以暫時都唔需要太擔心嘅。同埋你本身有卵巢多囊症月經週期的確會比較唔穩定,再加上好似 @Cherry_StickyRiceLove 講有好多原因影響,如果真係好擔心,就可以搵返婦科醫生檢查啦。