想問問，本身一直月經不太隱定有時早有時遲，係9號既完事後先發現安全套穿咗，因為我上個月係16号來m怕衣段時間係危檢期，當日三個鐘內已經立即去私家診所配事後丸食，都依照醫生指示食完個療程，但因為過左兩日，完全feel唔到來m感覺，本身自己性格又好易情緒緊張，好怕中～如果真係好驚，食多一次事後丸或者衣幾日keep住食普通避孕藥(一直無食開)可唔可以減低到懷孕風險率?事後丸其實有效率幾多?
另外食事後藥當日同第二日都無乜唔舒服，但到今日第三日下腹開始keep住有d痛，係咪代表粒藥有作用，衣個情況係正常食後反應？
因為十分擔心～多謝解答
你好 @Latte 
如果你喺三個鐘內已經食咗醫生處方嘅事後丸，其實都唔洗擔心嘅，藥物宜家喺身體裏面發揮緊功效架啦。千祈唔好再食一次事後丸，因爲一個月經週期只可以食一次事後丸，所以事後丸係唔可以作爲恆常嘅避孕方式嘅。亦都唔好食普通避孕藥住，因爲普通避孕藥都係需要係月經嚟緊期間去食嘅，亦都唔會因爲你食咗而導致你快啲嚟月經。本身事後丸嘅劑量已經好足夠，所以無需要再食其他藥去輔助。
事後丸嘅原理係透過高劑量嘅荷爾蒙去抑制排卵或干擾受精過程，而避孕藥就係透過長期嘅服用去出取代身體嘅荷爾蒙週期嚟抑制排卵，本身兩隻藥嘅功能係唔一樣，所以係唔可以互相取代嘅。
食完事後丸之後的確係會有啲人會有副作用，例如下腹痛、唔舒服或影響月經等等，但有無出現副作用同粒藥有無功效係無關係嘅。同埋並唔係話食完事後丸就會即刻嚟月經嘅，而係可能會影響你下一次月經嘅時間，可能係會提早或者延遲，如果粒藥係醫生度處方基本上都無問題架啦。至於痛嘅情況都係比較常見嘅，通常都係食完事後丸24小時內就會消失。如果持續嘅話，其實有機會係嚟月經時嘅經痛，所以都可以觀察下先嘅。如果真係好擔心，可以係性行爲後7日後驗孕，11日後就會有更加準確嘅結果架啦。
事後丸嘅失敗率其實好低，如果你食單一荷爾蒙（黃體酮）嘅事後丸就係只有2-3%，如果係黃體激素受體劑就更加只有1-2%，所以可以放心呀。暫時嚟講你都可以先等待下嘅，唔洗擔心。