急!有關事前藥同抗生素!!

想知如果我食咗大約兩個禮拜事前避孕藥,一直都準時食,但突然尿道炎,又有發生性行為,無套冇內射。依家睇咗醫生 開咗抗生素,醫生話會令事前避孕藥冇咗個作用,咁我應該點算,仲有4日藥未食,好擔心會有事。

Hello~好多謝你嘅提問,首先想問返你,你食事前避孕藥嘅時間係咪月經週期頭五日?如果係嘅話,咁你之前服用嘅事前避孕藥應該係有發揮到功效嘅。另外想問返你,你同伴侶發生性行為嘅時間係咪喺服用抗生素之前?如果係嘅話,就算冇使用安全套,懷孕嘅機率都係好低嘅,唔需要擔心。

而醫生嘅意思係而家處方俾你嘅抗生素同你所服用嘅事前避孕藥會有交互作用,所以由服用抗生素開始,事前避孕藥嘅效用會受到影響。

建議你先按照醫生指示服用抗生素,食埋剩低嗰四日藥,醫好尿道炎先。喺尿道炎未完全康復之前都唔建議發生性行為,避免令發炎情況惡化。直至下一次嚟月經之前,如果要發生性行為,都要使用可靠嘅安全措施,例如安全套。

而如果你想繼續食事前避孕藥,就喺下次嚟月經嘅頭五天再重新開始服用。記住喺開新藥頭一個禮拜內如果要發生性行為,都要使用安全套啊。

食避孕藥係係月經首日開始食。
性行為係係食抗生素前
而醫生開既抗生素暫時未開始食,只係食消炎藥。
但啱啱去廁所唔單止有橙紅尿,仲有血,同埋有啲m痛感覺,想知呢個情況係因為食藥定係因為真係早咗黎?

你好,回答返你嘅問題:
首先,你所講性行為係喺食抗生素前發生嘅,所以當時避孕藥係有發揮到功效,係咁嘅情況底下,懷孕嘅機率係好低嘅,唔需要擔心。
然後,因為你係月經首日開始食避孕藥,所以你現在嘅情況唔係嚟m。你而家見到橙紅色嘅尿液,好大機會係因為醫治尿道炎嘅抗生素而引起,呢個係食治療尿道炎抗生素好常見嘅一個情況。如果你好擔心的話,都可以打返去你去咗嘅嗰間診所或者醫院問返醫生,睇下佢開畀你嘅抗生素,會否影響到尿液嘅顏色。
最後,都見到你有講,近期好似有少少m痛嘅感覺,其實呢個好大機會係因為尿道裏面發炎而引起嘅下腹部不適。你都可以睇多幾日自己身體嘅狀況,如果仍然係非常唔舒服的話,都建議你去搵返醫生作進一步跟進以及檢查。
明白到可能近期你都會比較擔心,身體都會有唔舒服嘅情況,都希望你可以盡量放鬆心情,慢慢等自己嘅身體去適應呢啲新嘅轉變。希望以上的回應幫到你。

感謝你既回覆!

想知如果依家停 咁食完啲藥之後想食返事前避孕藥應幾時開始今?

喺下次嚟月經嘅頭五天再重新開始服用,如果喺重新食藥嗰個星期係需要發生性行為嘅話,都要使用返安全套啊:ok_woman:t2: