食避孕藥後出血

4月2號個陣睇婦科醫生,照超聲波照到有血瘤,醫生叫我食避孕藥可以改善。咁今個月就開始食避孕藥,其中中間漏咗一日冇食,但已經係月頭嘅事,之後都冇補返,而家食到最尾個幾粒,但呢兩日開始出現啡色分泌物,今日仲要出血,量唔多應該唔係月經,仲有少少經痛嘅感覺,但唔嚴重,只係少少唔舒服。係唔係避孕藥副作用?使唔使睇多次副科醫生?

更正返都幾多血,好似m come咁,但避孕藥未食完的,咁我仲應唔應該繼續食埋佢好?

係深啡色嘅血

你好,有幾個情況想了解多啲先,見到你講月頭嘅時候開始食避孕藥,照返一般避孕藥嘅數量去計,應該唔會現在食到最尾嗰幾粒,想問清楚你食嘅避孕藥係邊一種?另外,你所講食到最尾嗰幾粒,其實即係淨番幾多粒?因為現在市面上有21粒、24粒以及28粒裝,每一種嘅食用說明都唔同,而一般都會係停藥期或者食緊冇藥效藥丸期間嚟月經。

但其實係啱啱開始食藥嘅時候,因為身體需要時間適應由人造荷爾蒙進入體內,代替本身自然嘅規律,所以實際嚟月經嘅日子未必一定係停藥期或者冇藥效藥丸期間。而呢個適應期一般由一個月至三個月不等,亦有啲人可能需要更長嘅時間,身體先會適應都係比較準確同穩定嘅日子嚟月經。見到你提及現時已經食到呢排避孕藥嘅最後幾粒,相信都已經係比較接近會嚟月經嘅日子。如果你而家見到嗰個出血嘅情況係持續嘅,咁呢啲如無意外就係你今個月嘅月經,只係比預計提早咗嚟。你只要跟返避孕藥說明書嘅方法繼續食餘下嘅避孕藥以及如常地開新藥就可以。

而有關分泌物同經血嘅顏色,因為避孕藥其實係用人造嘅荷爾蒙去取代咗本身天然嘅荷爾蒙週期,隨住你嘅身體慢慢適應藥效,好多人嘅經血顏色都會變得冇咁深色,係偏啡嘅狀態。而月量都會慢慢變少。

另一方面,一開頭食避孕藥嘅時候,有機會有以下幾種副作用,包括:
頭暈、反胃、作嘔、流啡、下腹痛等等。你依家感受到類似M痛嘅感覺都有機會係副作用嘅一種。而一般藥物嘅副作用會喺一至三個月內慢慢減低,但如果呢啲症狀一直持續,就最好話返俾當初開始服藥前諮詢嘅醫生知。因此避孕藥有唔同牌子,每隻含有嘅荷爾蒙同埋劑量都會有分別,出現過大嘅副作用有機會係身體唔適應,可能需要試下其他牌子。你啱啱先開始食,唔需要咁擔心。

最後,見到你話自己曾經試過漏食藥但冇補食返,其實每個牌子都有指定嘅補食時間,一旦發現食漏咗其實喺指定時間內食返一樣係有效嘅。避孕藥係需要每日都服用先可以發揮功效,如果漏食咗就會影響藥效同身體適應嘅情況。尤其是係頭幾個月,身體要慢慢適應人造嘅荷爾蒙,要盡量避免漏食。