5月5-12嚟m 然後13號有一次性行為 冇套插咗幾下 有啲驚所以買咗事後丸 3月尾食過一次 今次係第二次食 而且兩次都係係藥房買 然後5月13號性行為後兩個鐘頭食咗 19號即係今日發現流啡色嘅嘢 而且呢兩日都好攰 瞓極都唔夠咁 係咪正常㗎
Hello~多謝你嘅提問
首先，因為你喺性行為之後嘅兩個鐘就已經食咗事後丸，所以懷孕嘅機率好微，暫時嚟講唔需要擔心嘅。如果擔心，最快你可以喺性行為發生7日後用驗孕棒驗孕，一般喺11日後或預計月經日子驗就會更加準確。至於流啡有機會係陰道出血，同你覺得好攰，瞓極都唔夠一樣，屬於服用事後丸後常見嘅副作用。但如果流啡同疲倦嘅情況持續，甚至惡化，咁就需要搵醫生檢查下身體啦！
不過都想提提你，事後丸係醫生處方藥物，自己喺藥房購買嘅話，藥物嘅質量難以保證，而且並唔係每個人嘅身體同情況都適合透過事後丸作緊急避孕，所以建議如果下次有需要，可以去返家計會，或者私家診所搵醫生處方。另外，事後丸嘅成份係高劑量嘅女性荷爾蒙同埋黃體素，食得太多有機會擾亂往後嘅經期同排卵期，嚴重嘅甚至會令子宮內膜變薄，導致較長時間嘅不孕。建議下次性行為可以用返安全套，或者持續服用事前避孕藥，避免懷孕嘅同時，減低對身體嘅傷害同負擔。
我依家嘅情況係好似嚟m 因為我依家情況同本身谷m好似 m痛瞓得唔好同埋成日都好攰 而且都幾多血都係偏深色 就好似嚟m咁
但係我呢個月已經嚟過M 會唔會係因為嗰粒事後丸
令到我咁呢
同埋我想問佢事後丸嘅副作用唔係只會維持一兩日咋咩 點解今日19好仲係會好攰咁 定係真係粒事後丸 擾亂我嘅月經週期 搞到我依家又嚟多次m呢
你好呀
因為事後丸係含有高劑量嘅荷爾蒙，所以並唔係每個人嘅身體都適合使用，而且喺香港係屬於需要醫生處方的藥物，因為事後丸內含有嘅荷爾蒙類型同埋劑量高，係有機會引致嚴重嘅副作用。而且避孕藥亦並非每個人都適合服用，一般常見唔適合食藥嘅情況，例如有心血管疾病、不規律陰道出血、體重過高等，自己喺藥房購買嘅話，藥物嘅質量難以保證，所以一般都會建議服用事後丸 / 避孕藥之前，必須諮詢醫生嘅意見，等醫生評估你嘅體質／生活習慣，係咪適合服用事後丸 /避孕藥，或者適合用邊一種緊急避孕嘅方法。事後丸有機會會導致不規則陰道出血，亦好常會影響下一次嘅月經（包括嚟嘅日子同血量嘅狀況等等）。一般來講，頭暈作嘔等嘅副作用通常只會維持一兩日，但其他副作用例如流啡，的確有機會會持續一段時間，幾時會消失亦好視乎個人體質。
暫時黎睇，你出現嘅比較大機會係屬於事後丸副作用所導致嘅不規則陰道出血—因為距離上一次月經日子比較接近，19日開始嘅深啡色分泌物會係月經嘅可能性都比較低。但其實除咗事後丸，有好多外在內在因素都可以影響到月經周期，例如生病、食過藥、生活作息有明顯改變或者情緒有大起伏，如果你呢段時間都有出現呢啲因素，加上事後丸嘅影響，就有機會更進一步影響今個月周期。
因為你本身想食嘅藥物冇經醫生處方，如果啲啡色分泌物未來幾日都有持續地流出，或者身體唔舒服嘅情況有加劇嘅跡象，我哋都會建議你盡快去睇醫生。你可以考慮去家計會診所或者一般私家或婦科診所，同醫生講番你發生性行為嘅日子，同埋如果有印象的話，食咗邊隻牌子嘅事後丸，等醫生評估一下你嘅狀況睇吓可以點樣跟進。
依家嘅狀況係 真係好似嚟m 咁所以係咪提早咗嚟m
但係我係5號嚟m 提前咗兩個禮拜係咪都正常
直程係要用埋m巾
你好
你講嘅情況的而且確有機會會發生，但係由於你現在流啡嘅日子，同你上一次月經嘅日子比較接近，所以機會比較細。不過流啡嘅量似月經咁多，我哋都會有啲擔心，所以都建議你去搵家計會嘅醫生。
如果你26歲以下，係可以用家計會嘅青少年保健服務，你可以直接打去想去個診所度預約，亦可以去家計會嘅網站揀返【醫療服務】>【青少年保健】>【e-服務預約｜青少年保健服務】進行預約架啦。如果係用e-服務預約的話，職員會係辦公時間內打電話俾你了解多啲你嘅情況同埋確認。
如果你已婚或26歲以上，可以打電話去家計會的節育診所預約。
依家唔係流啡了 直接係深紅色嘅血
Hello~如果而家嘅血量比較多，並且係深紅色嘅話，比較大機會係陰道或者子宮出血，建議盡快睇醫生。女性喺經期時出血過量，或是喺非經期、更年期後嘅子宮出血，就屬於陰道出血。 而子宮異常出血或陰道不正常出血，可能係子宮頸發炎、壓力大、荷爾蒙失調等原因造成。因為早期嘅子宮頸癌或癌前病變，最常見的症狀就係陰道流血或者分泌物異常，所以搵一個可信賴嘅婦科醫生check清楚會安心啲。
好的唔該你