食漏左一日事前

女朋友食開21日嘅事前避孕藥 食少左一日點算好?上網見係連續2日食2粒 之後每日一粒 食到食完為止 咁啱唔啱?

姐係今日食2粒 明天繼續食返一粒
之後不停藥繼續食下一包21粒
食完下一包21粒之後係唔係先停7日?定係等月經先開始再食?

定係今日食2粒 之後每日都照係一粒
跟住照停7日?

你好

首先都想了解返,你女朋友食呢隻避孕藥之前有冇諮詢過醫生意見?因為唔係每個人都適合食避孕藥,而且市面上有好多唔同牌子同劑量嘅避孕藥。所以建議喺第一次食避孕藥之前,要睇醫生,等醫生評估你女朋友嘅身體狀況係咪適用避孕藥,同埋根據你女朋友嘅狀況建議適合你嘅種類同劑量。現時部分私家診所同家計會診所有提供呢個服務嘅。另外,你女朋友食呢隻避孕藥食咗幾耐?如果係第一個月開始食的話,藥效喺體內未穩定建立,漏食藥的話風險會比較高。

一般來講,漏食藥嘅話,需要係牌子指定嘅時間內補食,藥物嘅說明書通常都會有註明(一般係12至24小時),如果可以喺指定時間內補食,然後照食當日同餘下嘅藥物,咁就對避孕效果沒有影響。

但如果喺指定時間外補食/冇補食嘅話,雖然可以照平時咁食今日同餘下嘅藥,但未來7日如果要發生性行為就要額外使用返安全套。

而如果已經連續漏食兩粒或以上藥,咁藥物係體內所建立嘅避孕功效有機會已經受到影響。你哋可以選擇繼續服食餘下嘅藥物,但直至月經嚟之前都會需要係性行為期間額外使用安全套。

如果唔放心的話亦可以去家計會診所或者其他私家診所見醫生,了解適合嘅處理方法。

最後,你可以建議女朋友考慮用一啲app提醒同埋記錄每日服藥嘅情況,咁就可以減少食漏藥嘅情況發生啦。希望解答到你啦。