當你開始鍾意佢,佢就唔鍾意你

同佢一齊半年,經朋友介紹,最近分左手。
未識佢之前有年半無拍拖,因為之前俾人hurt得多,所以覺得單身嘅日子好開心,想點就點,好free,又唔洗擔心俾人傷害,所以唔敢開始一段關係,不過見自己年紀唔細,係時候要搵一個真心對自己嘅人,所以終於肯踏出第一步,經朋友介紹認識左佢,第一印象覺得佢無特別好吸引,但對住佢又有小小緊張,連佢個樣都無點望過,之後交換電話,傾左一個星期左右單獨約左出街,我哋唔係去啲咩浪漫地方,而係陪佢去睇傢俬,因為佢將會自己住,想搵我一齊俾意見,我都無咩所謂,唔會覺得悶,都有小小開心,所以佢間屋嘅部分傢俬都係因為我而揀,最後單獨出左幾次街好快就一齊,因為我哋興趣都幾夾,好傾得埋,但我哋當初講一齊嘅時候有傾過都係試下,如果覺得唔岩就要出聲,啱啱一齊嘅時候,我都好唔習慣,好似唔記得點拍拖,加上我哋工作關係,好難夾到時間見面,同我份人係一個好冷靜,外冷內熱嘅女仔,好就得人同好簡單,不過就唔識表達自己,我哋一齊嘅時間咁岩就係佢生日,之後聖誕同新年,佢生日嘅時候我諗住氹佢開心,所以準備左佢鍾意好耐嘅公仔俾佢,佢一直唔捨得買,佢收到嘅時候係睇得出佢真係好開心,之後佢就開始忙間屋嘅事,因為佢話想盡快搞掂,等我哋可以快啲二人世界,到佢之後間屋終於搞掂,佢搬咗入去,比左key我,我都好開心,不過我當時都唔係成日上去,夾到假先會上下去,同佢轉左另一個部門,時間上越嚟越難就,加上第五波疫情,更加少左時間見面,其實係當時我已經覺得佢無當初同我一齊時嘅熱情,見面少左,無點主動叫我上佢到搵佢,因為我性格好被動,就算好想見都唔知點出聲,我唔confirm我會唔會阻住佢,我哋亦無點傾過電話,淨係WhatsApp,終於有一晚,佢主動同我傾,問我覺唔覺得大家個熱戀期太快過,我話覺,佢話我同佢鍾意啲類型係完全相反,但係當初就係想同我一齊,當下聽到都幾唔開心,又話唔確定我係咪真係鍾意佢,因為我唔識表達自己內心世界,佢話feel唔到我嘅愛。。。佢話開始無信心繼續落去,我果時就諗其實佢當時追我嘅時候都知我係點。。不過我都認,我成日收埋自己。。加上當我感覺到佢對我無咁熱情,我都開始卻步,我答佢,咁我哋再試多陣,努力過唔岩就算啦,佢話好。之後我都開始改變,會主動多左,打電話俾佢,又話搵佢,雖然都仲係好少見,直到前幾日,我話收工搵佢,佢話好,上到去飲左少少酒,終於佢同我講話知我有努力過,但感覺無分別,佢話自己無想像中咁鍾意我,我當下真係好唔開心,我連點解都唔想問,佢都無解釋,我話咁算啦,當晚我想走,佢拉住話好夜,第日先,成晚無瞓過,天光我就執嘢走,走之前佢攬住咗我,但我無主動攬佢,搭的士期間我係咁喊,我發現其實自己都係鍾意佢,只係可能自己當初唔識得點樣去做,不過我係唔會死纏爛打果種人,亦都唔會主動搵佢,但呢幾日係咁諗住佢,究竟佢係咩心態,真係唔明。

Hello~好多謝你嘅分享~好明白你由原本一個人、自由自在嘅狀態,進入一段戀愛關係嘅時候,會有好多嘅迷惘同埋忐忑。好欣賞你同佢喺一齊嘅時候有達到共識,同埋列清楚個人嘅界線,承諾如果覺得唔啱就要出聲,向對方坦白。就算對佢嘅第一印象唔係特別深刻,但係因為興趣相投,最終都係選擇左對方。即使拍拖嘅時候唔係去啲浪漫啲嘅地方,反而要幫對方揀傢俬,你都一啲都唔介意,反而有啲開心。而對方就想快啲搞掂屋企嘅事,可以同你上去二人世界。以上嘅例子都睇得出你哋兩個都好重視呢段關係。其實都明白喺疫情期間出入好唔方便,加上工作關係,時間真係難就,變相令到相處時間少咗,感情慢慢變淡,真係幾無奈嘅。聽到你話自己係外冷內熱嘅人,所以比較被動,但係喺聽到對方嘅意見之後,都有努力嘗試作出改變。雖然對方未必察覺得到,但係你勇於改變嘅呢個勇氣係非常值得嘉許嘅,唔需要怪責自己。

其實喺一段關係裏面,最緊要嘅就係溝通,有啲時候唔講出嚟,對方可能真係唔知道你點諗。其實表達自己意見嘅方法有好多種,文字、音樂、圖像、甚至肢體語言都可以,唔一定要大大聲聲將愛講出嚟,搵一個你覺得舒適嘅方法表達就可以啦!見到佢話唔肯定你係咪真係鍾意佢,同埋覺得熱戀期太快過,可能係因為少咗見面,你能夠用嚟表達自己嘅渠道少咗,所以對方難以適應,開始質疑呢段關係嘅穩定性同埋真確性。如果唔確定對方得唔得閒,可以預先問定對方嘅時間表,準備一啲小驚喜,例如你之前送嗰個公仔咁,或者一齊制定一個時間,傾電話或者視像通話,將日常生活嘅一小部份時間特登預留俾對方,都可以令到對方覺得受重視同埋被愛。

見到你話雖然佢講覺得自己冇想像中咁鍾意你,但係又拉住你唔俾你走,仲主動攬你,係有啲矛盾嘅。如果你唔肯定對方嘅取態,直接問清楚係最好嘅。見到你呢幾日每日都諗住佢,想挽救又唔知點做,個心情一定好複雜。可以試吓坦白同對方講你而家嘅想法同心情,俾對方知道其實你好鍾意同埋好重視佢,只係唔知道用乜嘢表達方式佢會容易啲接收到,再聽吓佢嘅諗法,一齊思考吓有咩辦法可以達到平衡,再鼓勵大家將自己嘅感受同需要講出嚟,然後制定有共識嘅相處模式。

喺愛情裏面冇嘢係恆久不變嘅,好多時候都需要磨合同協商,共同努力,面對唔同階段嘅困難同挑戰。有陣時的確會覺得好攰,同埋好心噏,需要搵一啲渠道抒發,尋求安慰同建議。好歡迎你繼續將煩惱話俾我哋聽,我哋會一直喺度支持你,希望你喺愛情嘅路上會得到幸福:heart:

好多謝你哋嘅意見。我都明白可能自己真係唔識得表達感受出嚟,我都曾經問過自己,點解當有唔開心嘅時候唔再強烈啲表達講出嚟,係當時我又同佢講過,我哋真係好少見,佢答我無辦法啦,佢工作忙,時間又難就,我當時無出聲,我只係覺得如果想見一個人無論點都會抽到時間,所以就算想點樣表達我嘅感受,又或者想比小驚喜佢,都好似做唔到。其實佢自己住,我相信可以相處嘅時間其實可以好多,但係佢好似唔肯犧牲,我感覺唔到佢好想見到我,可能當時佢已經開始feel到對我嘅感覺變淡,我都開始落閘,不過大家一路都冇講。。感覺已經冇咗佢當時追我嘅嗰份熱情。但係都想嘗試,其實係分手第二日佢有搵過我,問我係咪嬲緊佢,我話係,因為佢未忘記前任,佢話呢個都係一個可能性,最主要係同我相處感覺,我就話,你無想像中咁鍾意我嘛,佢答嗯。。我之後就完全冇覆過佢,我當時係諗,佢係咪二次傷害緊我,其實佢搵我做咩呢?我真係喊又唔係笑又唔係,只係好心噏。。心諗佢想點?分手時佢有問過我我哋會唔會再見,我答唔會。因為我係到諗,究竟佢同我一齊嘅呢半年係咪假?佢話無想像中鍾意咁點解要同我一齊。。我好懷疑,但我都完全無問過佢,就算呢一刻我會諗住佢都好,我都唔敢去搵佢,因為就算知道真相,我相信唔係我想要嘅嘢。。我有時都會望電話睇吓佢會唔會有機會搵吓我,但另一方面我又想佢唔好搵我,我想努力忘記佢。。好矛盾

Hello​:smiling_face_with_three_hearts:明白你喺呢一件事上面都有可能會怪責自己,點解嗰陣唔表達多啲自己嘅感受,或者個結果會唔一樣。但都想同你講,一段健康嘅關係入面需要兩個人去維繫,見到你有提及佢因為搬屋同埋工作嘅關係選擇少啲陪你,而你喺呢方面就覺得其實如果想見無論點都會抽倒時間,我哋喺度見到你同佢想法嘅分別,所以即使你做咗主動嗰個,對方都未必想配合🥲但你亦都唔需要覺得好無奈或者點解對方唔肯配合,可能只係喺呢個話題上你同對方冇一致性嘅解決方法,唔代表你咁諗/佢嘅諗法有錯~

好似上面嗰位同事所講,無論喺任何關係入面,溝通都好重要。都明白當佢搵返你嘅時候,佢坦白佢未忘記前任呢一個答案好傷害到你嘅心,而且聽到佢話冇想像中咁鍾意你,真係好大打擊:pleading_face:但如果睇返轉頭,如果可以好好地溝通,了解大家嘅想法,有可能你哋都會願意表達自己嘅想法。或者如果從一開頭你就好鍾意佢,但你知道佢未放低前任,而且對你唔係好大感覺,你仲會唔會同佢開始呢段關係?相信如果要開始下一段關係,你嘗試喺開始關係之前了解多啲對方嘅想法,亦都比對方了解你嘅想法,就可以避免呢啲誤會,亦都希望開始咗關係之後,同伴侶有一個持續嘅溝通,都可以令一段關係入面避免產生「估吓估吓」嘅情況:frowning:

最後明白你而家嘅心情會好矛盾,你又會想對方搵你,但你又好想忘記佢:exploding_head:但相信你知道一樣嘢,就係你希望喺親密關係入面追求一個點樣嘅伴侶/關係。呢段時間可以當係比自己冷靜下,除咗重新諗吓對方係咪你想要嘅人,亦都可以諗吓其實你下一段親密關係想得到啲咩,或者你期待對方會為你做啲咩。呢度可以推介一個測驗俾你,叫做「愛之語」(love language),佢可以反映到自己對一段關係嘅需要,同埋有啲咩期望。當你做完呢個測驗,佢會顯示你係屬於邊一個種類嘅人,例如有「肯定的言語」,「身體的接觸」,「禮物的饋贈」等。以「肯定的言語」為例,佢就係反映你喺一段關係裏面期望有正面,鼓勵,有同理心嘅溝通方式。行為方面,會期望對方係不經意嘅時候送一啲鼓勵嘅字條或者信。你都可以試吓做呢個測試,幫助自己整理一下係一段關係入面你需要啲咩,同時都可以了解吓自己:ok_woman:t2::heartpulse: