討論避孕方法

想知點樣同女朋友討論避孕方法
有時女朋友會要求我唔戴安全套,甚至乎收埋啲套

有討論過去食事前藥不過又因為啱啱嗰次經期趕唔切所以未去睇醫生

前排都有進行咗一次唔安全性行為
但係我就有啲驚,插咗一、兩分鐘就拎返出嚟
雖然途中感覺到下體有一下好短的短嘅收縮
之後亦有檢查過冇精液係射過出嚟,而連尿道腺球液都冇

自己有嘗試過同女朋友討論過一定要俾我戴安全套,但佢對呢件事有啲唔開心
同一時間我又想保護返女朋友,唔希望佢成日食事後丸

P.s.想請問如何更改username

Hello~好多謝你嘅提問。好欣賞你喺進行性行為嘅時候會考慮到女朋友嘅心情,同埋想保護佢,所以唔想進行安全嘅性行為。亦都明白到因為呢個問題,你哋可能會有爭執同埋唔開心,甚至乎冇辦法好享受性交嘅過程。首先,建議可以了解返點解女朋友會要求你唔帶安全套,甚至會收埋佢哋。因為有啲人對安全套嘅材質過敏,可能會出現痕癢腫痛嘅徵狀,所以冇辦法使用安全套避孕。如果女朋友因為生理或者心理嘅原因,非常抗拒使用安全套嘅話,唔建議強迫佢使用。可以嘗試使用其他安全措施,搵出大家都覺得舒服嘅解決方法。

另外,你都可以主動同女朋友解釋點解你想使用安全套,俾佢知道因為你好重視你同佢呢段關係,唔希望佢受到傷害,所以先希望使用安全套,減低懷孕同埋患上性病嘅風險。另外,都可以話俾佢知長期食事後丸嘅後果,希望佢可以正視問題。事後丸嘅成份係高劑量嘅女性荷爾蒙同埋黃體素,食得太多有機會擾亂往後嘅經期同排卵期,嚴重嘅甚至會令子宮內膜變薄,導致較長時間嘅不孕,所以服用事前藥或使用安全套長遠嚟講會係較佳嘅避孕方法。

其實,避孕嘅方法有好多種,除咗事前避孕藥同事後丸之外,仲有避孕針同避孕貼等等。如果驚唔記得咗定時食藥或者打針,可以考慮放置子宮環入子宮腔,作長期避孕之用。不過,喺服用任何藥物/做手術之前都記住查詢醫生,並定期由醫護專業人員進行評估,最少每年一次,確保有發揮到功效。

現時,男性避孕藥已經通過咗安全測試,不過仲需要啲時間先能夠完全推出市面。如果到時候有需要嘅話,都可以同女朋友協商,考慮服用男性避孕藥。最緊要係俾佢知道,其實你好關心佢嘅健康,想承擔起照顧佢嘅責任,唔希望對佢造成負擔,所以先希望同佢討論避孕方法。

最後,至於更改username,我哋嘅系統暫時唔能夠畀用家更改帳戶名稱。如果有需要,可以使用另一個電郵地址,開設新帳戶。唔好意思為你帶嚟不便:bowing_woman:t2::bowing_woman:t2:

多謝晒你

試過傾過係因為佢會覺得咁樣舒服啲
不過我自己又係衰仔,因為我都係有反對權

但係每一次我都好驚
好似今次咁,雖然只係插咗幾下,亦都確認咗冇精液流過出嚟
上網亦都有見過有白色白帶即係唔係危險期,而同時即使有尿道腺球液都好亦都唔係真係咁多精子

想問咁樣風險同一般體內射精係咪差唔多?:pray:t2:

Hello~尿道腺球液含有嘅精子比一般體內射精少,所以原則上嚟講,懷孕風險會細啲,但仍然有機會導致懷孕。而有白色白帶唔一定唔係危險期,因為分泌物會隨着月經周期,生活規律,飲食習慣同埋運動量等等變化,有機會出現顏色同埋質量嘅變化。「白帶」係由子宮頸管、陰道、陰道口等生殖器官各部位所分泌的黏液,同滲出物混合而成的白色黏稠物質,有保持陰道濕潤、避免陰道乾燥、防止細菌入侵以及將廢物排出,幫助陰道進行自淨作用等功能。 而女仔在排卵期前至排卵後,有機會出現較多透明黏液,有啲仲可能因為子宮頸腺體發達,成個週期都會分泌出透明或白色、無味的黏液。

一般來講白色嘅白帶係排卵期嘅時候出現嘅機會比較多,而排卵期前一至兩日懷孕嘅機率最高,所以反而係危險期。詳細嘅計算方法可以參考返以下呢個網站:計算危險期減低懷孕機率?了解安全期與危險期|安媞婦產科

不過都要留意,通過計算安全期嚟避孕係好唔準確嘅,因為人嘅月經周期係會隨住年齡,生活作息,壓力等因素變化,所以好難精準咁計算出安全期同危險期,避孕嘅成功率只有大約60-70%。建議搭配其他避孕措施(例如:安全套、避孕藥等…),盡量唔好使用呢個方法作為唯一的避孕方式。