女仔點樣確定自己係咪有淋病，如果真係有點樣治療(未成年加未夠16）求解pls
Hello，多謝你嘅提問
依到想了解翻，你係進行性接觸(口交，陰道，肛交等)嗰陣有冇使用安全套？
因為淋病通常係透過同有淋病嘅人嘅高風險體液（例如:精液， 前列腺液，陰道分泌）接觸而感染，例如性接觸，特別係接觸到有破損嘅黏膜組織（例如：陰道、肛門、尿道、口腔等表面較為脆弱嘅黏膜組織）。潛伏期通常係感染咗之嘅後2-5日會發病，有機會出現尿道流出混濁的奶狀或黃綠色的膿液、小便灼痛、陰莖／陰部痕癢等嘅病徵。
而當你透過唔同嘅部位進行性接觸，出現嘅淋病病徵係唔一樣，例如透過口交嘅話，有機會喉嚨出現白色分泌物或者類似喉嚨痛嘅症狀。而如果係進行肛交，就有機會令肛門流膿。
淋病喺女仔方面，明顯嘅症狀比較少，甚至可能冇病徵。如果有病徵，通常會係泌尿方面，小便嗰陣時會有刺痛，去廁所嘅次數亦都比平時多，同埋分泌物會有黃，綠色膿性白帶。
注意一點：
不論性別，有唔少人感染淋病之後都唔會出現病徵。所以單純以有冇出現病徵判斷自己有冇受感染就未必完全準確。如果有發生過高風險性行為，而對象有機會係有感染淋病，咁喺空窗期過後盡快搵醫生做檢查係比較安全嘅做法。如果冇及早醫治，可能會引致一啲比較嚴重啲嘅併發症
檢查方面淋病嘅測試空窗期係14日，即係話最快你係發生性行為後14日已經可以透過性病檢查了解自己有冇感染淋病，如你可以選擇以下嘅地方進行測試：
：搵一啲有提供性病檢查嘅私家診所，但相對價錢會比較貴。或者去有免費提供性病檢查嘅機構，但係通常比較少，或者只有提供檢查，唔包括治療。
：去家計會或者衛生署社會衛生科診所做檢查。
如果以你問題入面嘅年齡黎睇，建議去家計會嘅青少年保健診所度做檢查，佢哋嘅診所會為26歲以下未婚嘅青少年提供性健康相關嘅檢查同治療。青少年保健 - 香港家庭計劃指導會 喺網站內你會搵到診所地點、開放時間同埋服務收費，你需要事先打去預約或者用佢哋嘅網上預約服務登記，之後職員會喺辦公時間內打電話同你確認。
不過都要提醒返，喺香港法例之下，與未滿16歲嘅女性發生陰道交係違法嘅。如果你未夠16歲就發生過性行為，你仍然可以去家計會嘅診所接受治療，醫護人員唔會係冇得你同意之後報警或者聯絡你嘅屋企人，呢一點唔需要擔心。不過到時護士有機會另外同你會面，確保你喺性行為過程期間冇被強迫或者侵犯。
如果真係感染咗淋病，只要喺醫生處方下完成抗生素療程，係可以完全康復，唔使擔心
（Intern同學 Dorothy Cheung）
家計會真係唔會報警？佢哋會唔會偷偷地報警？同埋伴侶有淋病嘅機會係幾多
Hello~首先，家計會係咪唔會喺未得到你嘅同意下報警或者通知你嘅屋企人。以下有兩篇新聞報導可以俾你參考，分別係2011年和2014年的新聞：
http://dailynews.sina.com/bg/news/heh/mingpao/20111225/08003014883.html 210
//不過，張惠儀也認同，近年求助的年輕人對該會信任多了，她強調，即使求助者未滿16歲，若只是尋求緊急避孕，家計會將保持中立，不會主動通知家長或主動報警檢舉16歲以下性行為個案，以保障求助者的私隱，但會鼓勵事主把事件告知家長以商議解決方法，若未成年少女要轉介墮胎，更須先得家長簽署同意。//
//家計會發言人強調，本港有合法性交年齡的規定，不鼓勵非法性交行為。至於法律負任方面的顧慮，家計會輔導督導主任張惠儀強調，該會對求助者的資料是絕對保密的，並不會主動通知家長及報警。面對意外懷孕，大前題是生命攸關的考慮，因此鼓勵當事人積極尋求社區上的支援，循合法的途徑解決問題。//
至於伴侶有幾大機會感染淋病，好似以上嗰位同事所講，係取決於你哋嘅性接觸。如果接觸到高風險體液（例如:精液， 前列腺液，陰道分泌），即係接觸到有破損嘅黏膜組織（例如：陰道、肛門、尿道、口腔等表面較為脆弱嘅黏膜組織），咁機會就比較大。
不過，與其估估下，建議你可以同伴侶一齊做咗性病檢查先，等醫生俾專業嘅意見你。另外希望你明白，任何一方未滿16歲發生性行為，都屬於違法。為了你的伴侶著想，你哋應該等你滿16歲之後先進行安全性行為，咁樣你嘅伴侶先唔會被起訴刑事責任，大家亦唔洗擔驚受怕。性愛的確可以為人帶來歡愉，但係前提係要合法同埋做好安全措施，咁先能夠令自己嘅生活開開心心㗎～