今個月開始食避孕藥yaz
我今個月2/5第一日黎m食咗第一粒粉紅色藥丸
食到而家27/5剩低2粒白色藥丸
同埋今個月打左第三針
知道副作用係有機會擾亂月經周期
正常嚟講應該係白色藥丸就會黎m
想問吓如果食完白色藥丸都仲未嚟m咁我係應該直接開新一排繼續食?定係等佢黎
?
同埋中間22/5有試過冇套只係放左入去插左幾下
因為有食避孕藥所以會冇事？
Hello，多謝你嘅提問。抱歉，遲咗回覆你。🙇🏻♂️
首先，關於仲未嚟月經嘅問題，首先解釋返俾你聽，避孕藥嘅原理係通過服用人造荷爾蒙（雌激素加黃體素），抑制人體產生荷爾蒙同埋抑制排卵；同時都會改變子宮內膜嘅環境。而Yaz避孕藥暫時係市面上含有最低劑量嘅雌激素，好處係減低咗雌激素帶嚟嘅副作用，例如水腫、乳房不適；但低劑量嘅雌激素有機會令到服食初期子宮內膜增生不足，所以有機會出現月經血量好少／甚至冇月經出現嘅情況。如果你係正確服食藥丸，期間亦沒有任何嚴重嘔吐或者腹瀉，就可以避免意外懷孕嘅機會。正常情況下，Yaz避孕藥係食完28粒之後唔需要等，即使月經未完／未出現，都要食新嘅一排。所以只要食完四粒白色之後嗰日冇嚟月經都應該繼續開新嘅一包服用。
另外，你提及到22/5有試過冇帶安全套並有性接觸，呢度可以補充到少少就係，男性性興奮嘅時候會分泌透明嘅尿道球腺液，當中有機會含有少量精子。所以即使只係體外摩擦，或者未射精，只要性器官有直接接觸過就會有懷孕或者傳染性病嘅風險，但因為你已經服食事前避孕丸一段時間，而且期間如果冇嘔吐或者身體不適嘅情況，其實藥效已經發揮，所以意外懷孕嘅機會較低，唔需要太擔心～
雖然現時冇醫學證明，感染新冠病毒或者打疫苗會影響月經周期，不過係疫情期間，都有好多女性反映，感染新冠病毒或者打疫苗之後的確會令到月經周期錯亂，出血量變多/少等嘅變化。所以都唔可以排除因為你打咗第三針疫苗，導致月經延遲來，另外你都可以喺呢段時間觀察自己月經周期嘅變化，有需要可以諮詢翻醫生嘅意見。
希望有解答到你嘅問題
（Intern同學 Kelvin Chiu）